1307 GMT — Hamas ta taya Siriyawa murnar hambarar da Assad
A cikin wata sanarwa da kungiyar gwagwarmaya ta Falasdinu ta fitar a shafinta na intanet, Hamas ta ce: Muna taya 'yan'uwa al'ummar Siriya murnar samun nasarar cim ma burinsu na samun 'yanci da adalci.
"Muna kira ga dukkan bangarorin al'ummar Siriya da su hada kai su karfafa kasarsu da kuma samun waraka daga abubuwan da suka gabata.
0851 GMT — Isra'ila ta kashe mutum guda da jikkata huɗu a wani sabon hari da ta kai Lebanon
Rundunar sojin Labanon ta sanar da cewa mutum daya ya mutu sannan wasu sojoji hudu sun jikkata a wani harin da Isra'ila ta kai a kudancin kasar, inda a nan ne aka cim ma wata yarjejeniyar tsagaita wuta a watan da ya gabata tsakanin Hezbollah da Isra’ila.
Sanarwar da rundunar ta fitar ta ce, makiya Isra'ila sun kai hari kan wata mota kusa da shingen binciken sojoji na Saf al-Hawa/Bint Jbeil, inda suka kashe wani dan kasar tare da jikkata sojoji hudu.
Kamfanin dillancin labaran na ƙasar ya ruwaito cewa “jiragen saman makiya sun kai hari kan wata mota a kan hanyar Saf al-Hawa a Bint Jbeil kusa da wani shingen binciken sojoji, inda ya kashe direban, farar hula”.
0830 GMT — Mutum biyar ne suka mutu a zirin Gaza na Falasdinu yayin da sojojin Isra'ila ke ci gaba da kai munanan hare-hare a yankin, kamar yadda wata majiyar kiwon lafiya ta sanar.
Majiyar ta ce harin da Isra'ila ta kai kan wasu fararen hula a Jabalia da ke arewacin Gaza, ya yi sanadiyyar mutuwar mutum uku.
Majiyar ta ce, an kuma kashe mutum daya a wani harin da Isra'ila ta kai a Khirbet Al-Adas da ke arewacin Rafah a kudancin Gaza, yayin da wani Bafalasdine kuma ya rasa ransa a wani harin da jiragen yakin Isra'ila suka kai a wannan birni.
A cewar shaidu, sojojin Isra'ila sun bude wuta kan tantunan 'yan gudun hijira a yankin Mawasi da ke yammacin Rafah.
Sojojin Isra'ila sun kuma kona wata makaranta da ta kasance matsugunin fararen hula a Beit Lahia domin tilasta musu tserewa daga ginin.
0046 GMT — Sojojin Isra'ila sun banka wa wata motar ɗaukar kaya wuta da ke hanyar zuwa Gaza
Sojojin Isra'ila sun kona wata motar daukar kaya a unguwar Zeitoun da ke kudu maso gabashin birnin Gaza.
Sojojin sun tsayar da motar mai zaman kanta ne a lokacin da ta nufi yankin kudancin yankin ta hanyar Salah al-Din, kamar yadda shaidu suka shaida wa kamfanin dillancin labarai na Anadolu.
Sun kara da cewa sojojin sun tilasta wa direban motar ya sauka daga kan motar inda suka kai shi inda ba a san ko ina ne ba, sannan suka banka wa motar wuta.
0037 GMT —Isra’ila da Hamas na dab ta cim ma ’ƙwarya-ƙwaryar’ yarjejeniyar tsagaita wuta
Isra’ila da ƙungiyar Hamas ta Falasɗinawa na dab da cim ma wata ƙwarya-ƙwaryar yarjejeniyar tsagaita wuta, kamar yadda kafar watsa labarai ta Isra’ila ta bayyana inda take ambato majiyoyin siyasa.
Kafar watsa labaran ta ambato wata majiya wadda ba ta bayyana sunanta ba wadda ta ce bangarorin biyu sun kusa cim ma wata yarjejeniya ta tsagaita wuta wadda ake sa ran za ta kai ta tsawon wata biyu.
