Madaxweynaha Soomaaliya, Xasan Sheekh Maxamuud, ayaa shaaciyay in xukuumadda Muqdisho aysan marnaba aqbali doonin in Israa’iil ay saldhig milateri ka sameysato magaalada Berbera.
Madaxweynaha ayaa farta ku fiiqay in Tel Aviv ay qorsheynayso dhismaha saldhig ciidan-badeed iyo adeegsiga garoonka diyaaradaha ee magaaladaas.
Hadalkan ayuu Madaxweyne Xasan Sheekh ku yiri wareysi gaar ah oo uu siiyay telefishinka Al Jazeera, kaas oo si buuxda loo baahin doono maalinta Axadda.
Waxa uu xusay in ujeeddada dhabta ah ee ay Israa’iil u danaynayso Berbera ay tahay sidii ay ugu soo dhawaan lahayd dalalka Khaliijka iyo Iiraan.
Madaxweynaha ayaa carrabka ku adkeeyay in Soomaaliya aan lagu jiidi karin colaadaha ka aloosan Bariga Dhexe, isla markaana ay dowladdiisu ka hortagi doonto caqabadaha amni iyo kuwa diblumaasiyadeed ee ka dhalan kara qorshahaas.
Sidoo kale, waxa uu hoosta ka xarriiqay in shacabka ku nool xukuumadda gooni-u-goosadka ah ee Somaliland ay iyaguna si weyn uga soo horjeedaan joogitaan kasta oo ay Israa’iil ku yeelato deegaannadooda.
Aqoonsiga Israa'iil ee Somaliland iyo Mowqifka Muqdisho
Maamulka gooni-u-goosadka ah ee Somaliland ayaa sannadkii 1991-kii ku dhawaaqay inuu ka go’ay Jamhuuriyadda Soomaaliya, balse aqoonsi caalami ah ma helin ilaa dhammaadkii bishii Diseembar 2025, markaas oo xukuumadda Israa’iil ay si rasmi ah ugu dhawaaqday inay Somaliland u aqoonsatay dal madax-bannaan.
Dowladda Federaalka Soomaaliya ayaa si adag uga hortimid tallaabadaas, iyadoo ku adkeysanaysa in Somaliland ay tahay qayb ma-guuraan ah oo ka mid ah dhulka Soomaaliya.
Dhinaca kale, Madaxweyne Xasan Sheekh ayaa xaqiijiyay in Soomaaliya aysan waligeed xiriir diblumaasiyadeed la yeelan Israa’iil.
Waxa uu xukuumadda Tel Aviv ku sifeeyay mid gardarro iyo duullaan ku haysa shacabka Falastiin.
"Marnaba ma oggolaan doonno in dhulkeenna loo adeegsado saldhig milateri oo qayb ka noqda colaadaha ka jira Bariga Dhexe," ayuu hadalkiisa ku soo xiray Madaxweynuhu.
