Madaxweynaha Turkiga Recep Tayyip Erdogan ayaa bogaadiyay midnimada qotada dheer ee Turkiga iyo Falastiin, kaddib ciyaar saaxiibtinimo oo xamaasad leh oo lagu qabtay gobolka Konya ee bartamaha Turkiga.
“Caawa Konya, ciyaarta saaxiibtinimo ee dhexmartay Konyaspor iyo xulka qaranka Falastiin waxay tusaale gaar ah u ahayd walaaltinimada, midnimada iyo isku-duubnida qalbiyada dalalkeenna,” ayuu Erdogan ku yiri farriin uu ku wadaagay barta X.
Madaxweynaha Turkiga ayaa “salaam iyo kalgacal qalbi ah” u diray ciyaartoyda Falastiin ee Turkiga u yimid ciyaarta, iyo guud ahaan shacabka Falastiin ee wajahaya colaadda socota.
Erdogan ayaa u mahadceliyay taageerayaasha Konya ee buux dhaafiyay garoonka oo qaada 42,000 oo qof, kuwaas oo soo dhaweeyay xulka qaranka Falastiin, isla markaana si weyn u muujiyay taageerada ay u hayaan qadiyadda Falastiin.
Xus loo sameeyay carruurta Falastiin
Madaxweynaha ayaa sheegay in ciyaartu ay bulshada caalamka mar kale xusuusisay “musiibada iyo xasuuqa” ka socda Falastiin iyo Gaza.
“Ka Turkiga ahaan, waxaan sii wadi doonnaa inaan midnimo iyo garab istaag la muujinno walaalaheen Falastiin iyo Gaza, xuquuqdoodana ka difaacno fagaarayaasha caalamiga ah, annagoo sida ugu xooggan u muujinayna taageeradeenna,” ayuu Erdogan raaciyay.
Ciyaarta ayaa la qabtay fiidnimadii Arbacada, iyadoo qayb muhiim ah ka ahayd munaasabadaha gaarka ah ee “Maalinta Falastiin” ee Konya, waxaana lagu qabtay xus iyo munaasabado lagu doonayay in indhaha caalamka lagu soo jeediyo kumanaanka carruurta ah ee naftooda ku waayay Falastiin.
Garoonka dhexdiisa, ciyaartu waxay ahayd mid tartan adag leh.
Konyaspor ayaa goolka furitaanka dhaliyay laba daqiiqo gudahood, waxaana u dhaliyay Melih Ibrahimoglu. Xulka qaranka Falastiin ayaa kaddib laba gool oo uu dhaliyay Mohammed Sandouqa daqiiqadihii 12-aad iyo 25-aad ciyaarta ku hoggaamiyay 2–1.
Weeraryahanka Konyaspor Mostafa Mohamed ayaa daqiiqaddii 28-aad dhaliyay goolka barbaraha, iyadoo qaybtii hore lagu kala nastay barbaro.
Inkastoo labada dhinac ay heleen fursado weerar oo badan qaybtii labaad, midkoodna ma dhalin gool kale, waxaana ciyaartii saaxiibtinimo ee taariikhiga ahayd ay ku soo dhammaatay barbaro 2–2 ah.
