Siddeed qof ayaa lagu dilay weerar gaadmo ah oo Talaadadii lala beegtay gaari ciidan oo galbinayay shaqaale ka shaqaynayay dhismo waddo oo ku taalla ismaamulka Mandheera ee dalka Kenya, sida uu xaqiijiyay guddoomiyaha ismaamulkaas.

Sida lagu xusay bayaan uu soo saaray Guddoomiyaha Mandheera, Maxamed Aadan Khaliif, weerarkan ayaa ka dhacay aagga Hagarsu ee teedsan waddada isku xirta Mandera-Arabia-Lafey, iyadoo bartilmaameedku uu ahaa gaari ammaan oo ilaalinayay shaqaalaha ku hawlanaa mashruuca dhismaha waddadaas.

Dhibbanayaasha ayaa isugu jiray shan ka mid ah shaqaalaha dhismaha waddada, laba xubnood oo ka tirsan Ciidanka Kaydka Booliska Kenya (KPR), iyo darawalkii gaariga.

Guddoomiyaha ayaa sheegay in dhammaan siddeeddii qof ee gaariga saarnaa ay goobta ku nafwaayeen.

Guddoomiye Khaliif ayaa si kulul u cambaareeyay weerarkan, isagoo ku tilmaamay khasaare weyn oo soo gaaray qoysaskii ay dadkoodu ku dhinteen iyo guud ahaan bulshada Mandheera.

Wuxuu xusay inay si gaar ah xanuun u leedahay in shakhsiyaad ka shaqaynayay horumarinta kaabayaasha dhaqaalaha ee deegaanka ay noloshooda ku waayaan dhacdadan masiibada ah.

Isagoo ku hadlaya magaca dowladda ismaamulka iyo dadka deegaanka, guddoomiyuhu wuxuu tacsi tiiraanyo leh u diray qoysaskii eheladooda waayay, isagoo u rajeeyay xoog iyo samir dhammaan dadka ay dhacdadani saameysay.

Wuxuu sidoo kale ugu baaqay hay’adaha amniga inay si degdeg ah u bilaabaan baaritaan ku aaddan weerarkan, si loo xaqiijiyo in caddaaladda la horkeeno kooxihii ka dambeeyay.

“Shacabka Mandheera waxay mudan yihiin nabad iyo ammaan, iyo in ay helaan deegaan mashaariicda horumarineed ay uga socon karaan cabsi iyo cagajugleyn la’aan,” ayuu yiri Guddoomiye Khaliif.

Wuxuu intaas ku daray in maamulkiisa ay ka go’an tahay inay sii wadaan wada-shaqaynta dhammaan dhinacyada ay khuseyso, si deegaanka looga hirgeliyo nabad iyo xasillooni waarta.