Xoghayaha Koowaad iyo Xoghayaha Labaad ee Safaaradda Jamhuuriyadda Federaalka Soomaaliya ee dalka Koonfurta Suudaan ayaa Khamiistii booqasho tacsi ah ugu tagay xarunta Safaaradda Turkiga ee magaalada Juba, kaddib geeridii naxdinta lahayd ee ku timid Danjirihii Turkiga u fadhiyay dalkaas, Marxuum Metin Ergin.
Mas'uuliyiintan ayaa safaaradda u gudbiyay dhambaal tacsi ah oo ay ka wadeen dowladda iyo shacabka Soomaaliyeed,iyagoo si rasmi ah u muujiyay sida ay ula qaybsanayaan murugada iyo tiiraanyada dowladda iyo shacabka Turkiga ee ay walaalaha yihiin.
Sidoo kale, diblumaasiyiinta Soomaaliya ayaa madaxda safaaradda gaarsiiyay tacsi gaar ah oo ka timid Jaaliyadda Soomaaliyeed ee ku dhaqan dalka Koonfurta Suudaan. Intii ay ku guda jireen booqashadooda, mas'uuliyiinta Safaaradda Soomaaliya ayaa saxiixay buugga tacsida ee yaalla xarunta safaaradda Turkiga, iyadoo qoraal rasmiga ah oo ay soo saareenna ay Alle uga baryeen inuu naxariistiisa Janno ka waraabiyo marxuumka.
Sooyaalkii Diblumaasiyadeed ee Danjire Ergin
Booqashadan tacsida ah ayaa imanaysa kaddib markii Danjire Metin Ergin uu isniintii (2-dii Nofeembar 2026) geeriyooday isagoo 59 jir ah.
Marxuumka oo ku dhashay magaalada Istanbul sannadkii 1967-dii, ayaa ahaa diblumaasi rugcadaa ah oo Wasaaradda Arrimaha Dibadda Turkiga ka tirsanaa tan iyo sannadkii 1992-kii. Intii uu ku guda jiray waayihiisa shaqo, wuxuu qarankiisa ku matalay xilal kala duwan oo ay ka mid yihiin Qunsulka Guud ee Turkiga ee magaalooyinka Mostar (Bosnia iyo Herzegovina) iyo Antwerp (Belgium), ka hor inta aan loo magacaabin Danjiraha Turkiga ee Koonfurta Suudaan.
Wasiirka Arrimaha Dibadda Turkiga, Hakan Fidan, ayaa bayaan uu Talaadadii soo saaray ku ammaanay kaalintii marxuumka. "Waxaan tacsi u dirayaa qoyskiisa sharafta leh, ehelkiisa iyo bulshadeenna, waxaana Alle uga baryayaa inuu naxariistiisa siiyo Danjire Ergin, oo dalkeenna si daacadnimo ah ugu soo adeegayay muddo 35 sano ah," ayuu yiri Wasiir Fidan.
Sida ay xaqiijisay Wasaaradda Arrimaha Dibadda Turkiga, Danjire Metin Ergin waxaa maanta oo Jimce ah (6-da Nofeembar 2026) lagu aasi doonaa Qabuuraha Zincirlikuyu ee magaalada Istanbul, salaadda Jimcaha kaddib.
