Hay'adda Sirdoonka iyo Nabadsugidda Qaranka Soomaaliya (NISA) ayaa sheegtay in toddobo xubnood oo ka tirsan Al-Shabaab lagu dilay, halka laba horjooge oo ka tirsan kooxdana lagu dhaawacay howlgal ka dhacay gobolka Shabeellaha Hoose.
Sida lagu sheegay qoraal rasmi ah oo ka soo baxay NISA, howlgalka oo dhacay 11-kii Agoosto ayaa laga fuliyay deegaanka Tawakal, iyadoo hay'addu sheegtay inay kaashatay saaxiibada caalamiga ah.
NISA ayaa sheegtay in howlgalka lagu bartilmaameedsaday goob ay ku sugnaayeen xubno iyo horjoogayaal ka tirsan Al-Shabaab, kadib xog sirdoon oo laga helay halka ay ku shirayeen.
Hay'addu waxay sheegtay in xubnaha goobta ku sugnaa ay ka mid ahaayeen Yoonis Macallim Abuukar, oo Al-Shabaab u qaabilsanaa deegaanka Mushaani; Abuu Xaaji Fareey, oo kooxda u qaabilsanaa maleeshiyaadka deegaanka Tawakal; Ayaatullaahi, oo lagu sheegay inuu hoggaaminayay dagaalyahannada kooxda ee gobolka Shabeellaha Hoose; iyo Cabdifitaax Rooble, oo kooxda u qaabilsanaa ururinta lacagaha deegaanka Baladul-Amiin.
Sida ay sheegtay NISA, Yoonis Macallim Abuukar iyo Cabdifitaax Rooble ayaa dhaawacyo culus ka soo gaaray howlgalka. Hay'addu ma aysan faahfaahin xaaladda xubnaha kale ee ay sheegtay inay goobta ku sugnaayeen.
Dowladda Soomaaliya ayaa muddooyinkii dambe kordhisay howlgallada ka dhanka ah Al-Shabaab, iyadoo ciidamada dowladda iyo hay'adaha amnigu ay beegsanayaan dagaalyahannada, hoggaanka iyo xarumaha ay kooxdu ku leedahay qaybo ka mid ah dalka.
Dowladda Soomaaliya ayaa inta badan sheegta in howlgallada isku-dhafka ah ee noocan ah ay qayb ka yihiin qorshaha ballaaran ee lagu wiiqayo awoodda milatari ee Al-Shabaab, laguna burburinayo xarumaha ay ku soo abaabulaan weerarrada iyo goobaha ay ku dhuumaalaystaan madaxdoodu.
