A shirye Faransa take ta taimaka wajen kare kayayyakin makamashi na Saudiyya a cikin "tsarin kariya mai tsauri", in ji ma'aikatar harkokin wajen ƙasar a yayin da ake ci gaba da tashin hankali kan tsaron yankin.
"Muna tabbatar wa Saudiyya cikakken haɗin kai daga ɓangarenmu game da waɗannan hare-hare," in ji mai magana da yawun ma'aikatar harkokin wajen Faransa Pascal Confavreux a ranar Alhamis.
Jami’in ya ce a shirye Faransa take ta shiga cikin masu kare kayayyakin makamashi na Saudiyya, musamman waɗanda ke a yankin Yanbu da bututun mai na East-West.
"A shirye muke mu shiga, ta hanyar kariya mai tsauri, wajen kare kayayyakin makamashi, musamman Yanbu da bututun mai na East-West a Saudiyya," in ji Confavreux
Wannan jawabi ya zo ne bayan da 'yan Houthi na Yemen suka yi wa kamfanonin jiragen sama gargaɗin cewa sararin samaniyar Saudiyya na iya zama "wajen kai hare-haren soji."
Saudiyya ta fitar da rahoton mutuwar mutane uku a ranar Laraba a hare-haren da aka kai filayen jiragen samanta, ciki har da ɗaya a babban birnin Riyadh.
"Mun yi Allah wadai da dukkan waɗannan hare-haren da 'yan Houthi suka kai, kuma dole ne a dakatar da su, musamman sabbin hare-haren da kuka ambata jiya," in ji jami’in.
Kan batun Mashigar Hormuz, ma'aikatar ta ce al'ummar duniya suna da ƙudurin dawo da harkokin zirga-zirgar jiragen ruwa da kuma kiyaye dokokin ƙasa da ƙasa.
"Mu, al'ummar duniya, muna da sha'awar haɗin gwiwa wajen kiyaye dokokin ƙasa da ƙasa don dawo da zirga-zirgar jiragen ruwa a Mashigar Hormuz," a cewar Confavreux.
Kazalika Faransa ta shiga cikin aikin tsaron teku na Aspides na Tarayyar Turai a yankin, in ji mai magana da yawun, ba tare da bayyana kadarorin Faransa da ke ciki ba.
"Faransa tana taka rawa, tare da kare kadarorin da ba na so in yi tsokaci a kansu, a cikin aikin Aspides," in ji shi.
Mai magana da yawun ma’aikatar harkokin wajen Faransan ya ce, ƙasar ta goyi bayan aikin tun lokacin da aka ƙaddamar da shi a watan Fabrairun 2024 kuma za ta ci gaba da tallafa wa aiwatar da shi da duk wani ci gaba da zai yiwu dangane da yanayin tsaro na yankin.
