Hukumar ƙwallon ƙafa ta nahiyar Turai, UEFA, ta fara haɗa gwiwa da hukumomin ƙwallon ƙafa na sauran nahiyoyi domin tursasa wa shugaban hukumar ƙwallon ƙafa ta duniya, FIFA ya yi murabus.
UEFA da abokan ƙawancen da ke adawa da shugaban FIFA, Gianni Infantino, sun yi barazanar ƙaddamarwa tare da gabatar da gasar kofin duniya ba a ƙarƙashin FIFA ba, kamar yadda aka saba cikin kusan shekaru 100 da suka wuce.
Rahotanni sun ambato shugaban UEFA, Aleksander Ceferin tare da jami’an hukumar ƙwallo ta nahiyar Amurka, CONCACAF da ta nahiyar Asiya, suna ƙoƙarin tursasa wa Infantino ya yi murabus.
Wannan ya tabbatar da yadda sabon ƙawancen da aka ƙulla a duniyar ƙwallo yake girmama domin kawar da Infantino.
Sharaɗin da suka saka wa Infantino shi ne ya ajiye aiki, sakamakon yunƙurin da ya yi na sayar da hannun-jarin gasar kofin duniya ga ‘yankasuwa, duk da cewa ya janye bayan samun kakkausar suka.
Mai shekaru 56, Infantino ya shekara 10 yana shugabantar FIFA, kuma a halin yanzu yana neman sabon wa’adin jagoranci a zaɓen watan Maris na baɗi.
Gangamin tursasawa
Matuƙar Infantino ya dage kan ci gaba da mulki har ma ya nemi sabon wa’adi, to ƙawancen zai duba yiwuwar shirya nasa gasar duniya nta maza, wadda ita ce babbar gasar duniya wadda ake gudanarwa duk bayan shekaru huɗu, ƙarƙashin inuwar FIFA.
Tuni dai da ma UEFA take da wani shiri na ƙaddamar da wata gasar ƙasashen duniya da za ta yi gogayya da gasar Kofin Duniya. Hakan ya samo asali ne a 2017 lokacin da suka ƙuduri aniyar aiwatar da wannan tunani.
Bugu da ƙari, masu adawa da Infantino suna shirya wata dabarar ta ƙauracewa tarukan Majalisar FIFA da kwamitocinta, tare da ƙin lamuncewa da duk matakan da aka ɗauka.
Zuwa yanzu bayan da Infantino ya yi amai ya lashe, hukumomin ƙwallo na ƙasashe 15 kacal ne suka nuna goyon baya gare shi cikin jimillar ƙasashe 211 mambobin FIFA.
Hasali ma, hukumar ƙwallo ta Ingila ta bi sahun takwararta ta Wales wajen janye goyon baya ga Infantino, gabanin zaɓen shugabancin FIFA na baɗi.
A yanzu Ingila da sauran hukumomin ƙwallon za su ƙaurace wa gasar Kofin Duniya mai zuwa idan har shirin Infantino ya samu karɓuwa a taron, cewar UEFA.
Haka nan akwai batun ɗaukar matakin shari’a kan jami’an FIFA idan matsalar ta ci gaba da yin ƙamari.
