Yayin da aka saki sunayen haziƙan ‘yanwasan ƙwallo guda 30 da a cikinsu za a zaɓi wanda zai lashe babbar kyautar gwarzon ƙwallon ƙafa na duniya, Ballon d'Or a bana, masoya Barcelona sun fara gunaguni.
Babu sunan kyaftin ɗin Barca, Raphinha, da kuma ɗanwasan gaba, Pedri a jerin da ya ƙunshi wasu ‘yanwasan huɗu daban da ke buga wasa a ƙungiyar ta Sifaniya.
A Talata nan ne aka saki sunayen ‘yanwasa na rukunoni daban-daban da za a zaɓi gwarazan ‘yanƙwallo daga cikin, da masu tsaron raga, da koci-koci, da kuma ƙungiyoyi da suka yi fice a shekarar bana.
Matashin ɗanwasa Lamine Yamal, da Cubarsi da kuma Rodri, wanda a kakar bara ya buga wa Manchester City, su ne ‘yanwasan da suke buga wa Barca a yanzu. Sai kuma Ferran Torres wanda ya bar Barca ya koma Paris Saint-Germain bayan kakar bara.
Sauran shahararrun ‘yanwasan da ke jerin sun haɗa da Lionel Messi, Kylian Mbappé, Jude Bellingham, Marc Cucurella, Ousmane Dembélé, Luis Díaz, Bruno Fernandes, Erling Haaland, Harry Kane, Achraf Hakimi, Khvicha Kvaratskhelia, William Saliba, da sauransu.
Akwai dama
Masu sharhi kan ƙwallo na ganin cewa Pedri bai nuna bajinta a gasar Kofin Duniya da aka kammala a watan Yuli ba, inda Fabián ya take matsayinsa a tawagar Sifaniya wadda ta lashe kofin.
Shi ma Raphinha, wanda shi ne kyaftin ɗin Barcelona a yanzu bai nuna wata bajinta a Kofin Duniya ba, a tawagar ƙasarsa Brazil. Amma duk da haka rashin ganin sunansu duk da rawar da ya suka taka a Barca ya janyo cecekuce.
Hakan ya ƙara ba da mamaki kasancewar an ga sunayen ‘yanwasa har daga gasar Saudi Pro League ta Saudiyya, waɗanda ke bayyana a karon farko, wato Sadio Mané na AlNassr da Julián Quiñones na Al-Qadsiah.
A kakar bara, Raphinha ya buga wasanni 33 a Barcelona, ya ci ƙwallo 21 kuma ya lashe kofunan La Liga da Spanish Super Cup, kamar yadda shi ma Pedri ya lashe tare da shi.
Sai dai kuma, duk da wannan damuwa, masoya Barcelona na da kyakkyawan fatan ganin wani ɗan Barca ya lashe kyautar Ballon d'Or, kasancewar Lamine Yamal, da Rodri, wanda ya taɓa lashe kyautar a baya, suna wakiltar su.
