Daga Charles Mgbolu da Kudra Maliro
Kwamitin Tattara Kayan Tarihin Duniya na 2024 da ke gudanar da ayyukansa a Indiya tuni ya samar da labarai masu kyau ga nahiyar Afirka.
Kwamitin Tattara Kayan Tarihin na Hukumar Raya Al'adu da Tarihi ta Majalisar Dinkin Duniya, UNESCO, karo na 46 da aka fara daga ranar 21 zuwa 31 ga Yulin 2024, ya sanar da rubuta sabbin wurare 24 a cikin jerin abubuwan tarihi na duniya, kuma Afirka na kan gaba.
A cewar hukumar ta UNESCO, an saka wuraren al'adu 19 da wurare masu ban sha'awa na ainihi da wurare na haɗin gambiza daga ko ina a fadin duniya a cikin jerin abubuwan tarihi na Majalisar Dinkin Duniya, wanda ya kawo adadin zuwa 1,223 da aka rubuta.
Zamanin Dutse na Afirka ta Kudu
Kwamitin Tarihin Duniya na UNESCO ya amince da wurare uku na zamanin tsakiya da zamanin dutse, wanda ya yarda da gagarumar gudunmawar da Afirka ta Kudu ta bayar ga asalin halayen ɗan'adam na zamani. Waɗannan wurare su ne:
Diepkloof Rock Shelter kusa da Elands Bay a yankin Western Cape, an gano yana da wasu farkon shaidar amfani da alamomin ɗan'adam.
Sai Pinnacle Point Site Complex kuma a Mossel Bay duk a Western Cape, wanda ya bayyana mamayar mutanen tsakiyar Zamanin Dutse tsakanin shekaru 170,000 zuwa 40,000 da suka wuce.
Kogon Sibhudu da ke KwaDukuza a KwaZulu-Natal, wanda ke kunshe da shaidar wasu daga cikin misalan farko na fasahar dan'adam na zamani, kamar kibau ɗin ƙashi na farko (shekaru 61000) da kibau na dutse na farko (shekaru 64,000), da allura ta farko (shekaru 61000).
Sanya waɗannan kadarorin guda biyu ya ƙara yawan adadin wuraren tarihi na duniya na Afirka ta Kudu zuwa 12.
Fadar shugaban kasar Afirka ta Kudu ta nuna matukar godiya ga mambobin kwamitin taron karo na 46 saboda karramawar da aka yi wa kasar da tarihinta, da kuma abin da ta bari.
Fadar shugaban kasar, a cikin sanarwar, ta yi kira ga ɗaukacin al'ummar Afirka ta Kudu da su yi aiki cikin hadin gwiwa don tabbatar da cewa an kiyaye wadannan abubuwa masu muhimmanci na bil'adama tare da tura su don ba da gudunmawa mai ma'ana ga ci gaba mai ɗorewa a cikin al'ummomi da kuma ƙara shigar da ƙimar 'yancin ɗan'adam da zaman lafiya da sulhu.”
Kotun Sarauta ta Tiébélé ta Burkina Faso
Kotun Sarauta ta Burkina Faso ta Tiébélé ita ma ta shiga cikin jerin abubuwan tarihi na UNESCO mai daraja.
Kotun Sarauta ta Tiébélé, dake lardin Nahouri a yankin tsakiya-kudu na Burkina Faso, wani katafaren ginin gine-gine ne na kasa wanda ke tsaye tun karni na 16.
"Wannan jeri ba wai kawai yana taimakawa wajen adana wannan al'adun gargajiya ba ne har ma da inganta yawon shaƙatawa da kuma wayar da kan jama'a game da muhimmancin al'adun gida," in ji Traoré a shafin X.
Wurin yana wakiltar dabi'u da al'adun wannan kabila kuma ya zama wurin taruwa ga al'umma, yana karfafa al'adunsu.
Ginin, wanda aka lulluɓe shi da katanga mai kariya, Kotun Sarauta ta ƙunshi jerin gine-gine da aka tsara cikin nau'i daban-daban da bangwaye suka rarraba ahi da kuma wata mashiga da ke kai wa ga wajen taron biki da wuraren taro a wajen harabar.
Maza ne suka gina Kotun Sarauta sannan aka ƙawata bukkokin da kayan ado masu ma'ana waɗanda mata suka tsara, waɗanda su ne kawai masu kula da wannan ilimin da kuma tabbatar da cewa wannan al'ada ta wanzu.
A wannan sabon jerin, wurare hudu a Burkina Faso yanzu sun shiga cikin abubuwan tarihi na UNESCO, bayan rugujewar Loropeni a 2009, rukunin W-Arly-Pendjari a 2017, da tsoffin wuraren ƙarafa na 2019.
Kufan Gedi na Kenya
Kufan Gedi ma ya shiga jerin wurin tarihi na duniya na takwas a Kenya.
Gedi yana ɗaya daga cikin ƙauyuka na tsakiyar Swahili na bakin teku waɗanda suka tashi daga Barawa da Somaliya, zuwa kogin Zambezi a Mozambique.
Wurin na Gedi ya hada da wani gari mai katanga, wanda ya hada da masallatai, da fada, da gidaje masu yawa da aka yi da dutse.
Gidajen tarihi na kasa na Kenya (NMK) ya ce sanya wannan waje a cikin jerin wani yunƙuri ne da "ya kawo sabunta mayar da hankali kan ƙoƙarin kiyayewa da buɗe sabbin damarmaki don dorewar yawon shaƙatawa, bincike, da haɗin gwiwar kasa da kasa."
"Muna matukar girmama wannan rubutun, wanda ke nuna muhimmancin adanawa da inganta al'adunmu," in ji Darakta Janar na NMK Farfesa Mary Gikungu.
Sauran wuraren tarihi na duniya daga Kenya su ne wuraren shakatawa na tafkin Turkana da Gandun Dajin Kenya da tsohon garin Lamu; Tsararrun gandun daji na Mijikenda Kaya, Fort Jesus, Mombasa, Tsarin tafkin Kenya a cikin Babban Rift Valley, da wurin binciken kayan tarihi na Thimlich Ohinga.
