Rais wa Zimbabwe Emmerson Mnangagwa ametangaza Septemba 15, siku yake ya kuzaliwa, sikukuu mpya ya umma, kulingana na ripoti za gazeti la serikali la Herald.

Sikukuu hiyo ya umma itajulikana kama Siku ya Munhumutapa kusherehekea himaya ya Mutapa, ufalme wa Washona wa kabla ya ukoloni ulioenea katika sehemu za Zimbabwe na Msumbiji za kisasa.

Itaadhimishwa kila mwaka kuanzia sasa, kulingana na notisi ya serikali.

Sikukuu hiyo inaashiria uhusiano kati ya ukuu wa Milki ya Mutapa kabla ya ukoloni na harakati za kisasa za maendeleo ambazo zimeiona Zimbabwe ikifikia hatua muhimu katika miundombinu, usalama wa chakula na miradi ya uwezeshaji, gazeti la Herald linaripoti.

"Tamko hili ni sherehe ya ukuu wa kihistoria na wa sasa," afisa mkuu wa serikali ananukuliwa akisema.

Mnamo Julai Rais Mnangagwa alisaini marekebisho ya katiba ambayo yalifuta uchaguzi wa moja kwa moja wa rais na kuongeza muda wake na wa bunge kutoka miaka mitano hadi saba.

Bunge liliidhinisha marekebisho ambayo yaliongeza muda wa Mnangagwa hadi 2030.

Katiba iliyorekebishwa ilifuta upigaji kura wa umma katika uchaguzi wa rais, huku wabunge sasa wakiwa na jukumu la kumchagua rais.

Mnangagwa, mwenye umri wa miaka 83, ametawala Zimbabwe tangu 2017, kufuatia kuondolewa madarakani kwa mtangulizi wake, Rais Robert Mugabe, ambaye alifariki mwaka 2019, kwa kuungwa mkono na jeshi.