Serikali ya Jamhuri ya Kidemokrasia ya Congo (DRC) imemtuhumu Rais wa zamani Joseph Kabila kwa kupanga "shambulio la jumla" baada ya kuungana na waasi wa M23 ili kupambana na majeshi ya Kinshasa.
Kabila "ameamua kuhalalisha shambulio lake kubwa dhidi ya Jamhuri," msemaji wa serikali Patrick Muyaya aliambia shirika la habari la AFP siku ya Ijumaa, akiongeza kuwa "uamuzi wa kuchukua silaha unamaanisha kuua Wakongo kwa lengo la kujaribu kuteka maeneo."
"Wanataka kuanzisha harakati ili kujipa sura mpya, lakini kwa hakika nia zao, mipango yao ya kutisha, na mbinu zao za utendaji zinajulikana," Muyaya alisema katika mahojiano.
"Wahusika ni wale wale, na asili ya harakati hizo bado ni ile ile," aliongeza.
Siku ya Jumatatu, Kabila aliungana na waasi wa M23 kuongoza kundi jipya, akichukua nafasi ya moja kwa moja katika uasi unaoendelea kusababisha madhara makubwa katika eneo lenye utulivu mdogo la mashariki mwa DRC.
Kundi hilo jipya — linaloitwa 'Front for the Refoundation of the Nation' (FRN) — lilitambulishwa kama muundo wa "kisiasa na kijeshi" ambao "utajumuisha nguvu, rasilimali, na nyenzo zao" kwa lengo la "kukomesha udhalimu kwa njia yoyote ile, ikiwemo matumizi ya nguvu."
Litaongozwa na Kabila, huku viongozi wa waasi wa M23 wakihudumu kama manaibu wake.
Mwaka mmoja uliopita, Kabila alihukumiwa kifo akiwa hayupo mahakamani kwa kosa la "kushirikiana" na waasi wa M23.
Kabila, mwenye umri wa miaka 55, ambaye alitawala kuanzia mwaka 2001 hadi 2019, anatuhumiwa na mamlaka za DRC kuwa ndiye mwanzilishi wa 'Congo River Alliance' (AFC) — tawi la kisiasa la M23 ambalo sasa limevunjwa. Kabila amekanusha tuhuma hizo.
Wakati nyeti
Baada ya miaka kadhaa nje ya nchi, Kabila alijitokeza tena mwezi Mei 2025 katika mji mkuu wa mashariki wa Goma, ambao kwa sasa unadhibitiwa na waasi wa M23. Tangu wakati huo, amekuwa akifanya ziara za mara kwa mara katika maeneo yanayodhibitiwa na waasi hao.
Mapema mwaka 2025, mashambulizi yaliyoongozwa na waasi wa M23 mashariki mwa DRC yalisababisha kutekwa kwa miji ya Goma na Bukavu.
Tangu wakati huo, mstari wa mbele wa mapigano umetulia, ingawa mapigano yanaendelea — wakati mwingine yakiwa makali, yakihusisha mashambulizi ya ndege zisizo na rubani (droni) na silaha nzito — hasa katika jimbo la Kivu Kusini.
Kurejea kwa Kabila katika ulingo wa siasa kunakuja wakati wa taharuki kubwa.
Mikutano ya upinzani iliyofanyika mwezi Juni na Septemba ilipinga pendekezo la kurekebisha katiba, hatua ambayo inaweza kufungua njia kwa rais wa sasa, Felix Tshisekedi mwenye umri wa miaka 63, kuwania muhula wa tatu.
Tshisekedi, ambaye alichukua nafasi ya Kabila, atamaliza muhula wake wa pili — ambao kulingana na katiba ni wa mwisho wa miaka mitano — mnamo mwaka 2028.
Muungano mkuu wa upinzani hadi sasa umejitenga na Kabila.
Hata hivyo, Kabila ameonyesha kuunga mkono upinzani.
Katika hotuba iliyowekwa mtandaoni siku ya Ijumaa, aliikosoa serikali kwa kusema kuwa "inaongozwa tu na nia ya kujihakikishia kubaki madarakani".
