Gharama ya vita dhidi ya Iran kwa jeshi la Marekani imepanda na kufikia dola bilioni 43.6 kufikia tarehe 3 Septemba, kulingana na makadirio mapya yaliyowasilishwa kwa wabunge wiki hii.

Takwimu hiyo kutoka Kamandi Kuu ya Marekani (US Central Command), ambayo husimamia operesheni katika Mashariki ya Kati, inaonyesha gharama ya sasa zaidi ya mzozo huo tangu ulipoanzishwa na Marekani na Israel tarehe 28 Februari.

Ripoti ya Ofisi ya Bajeti ya Bunge (CBO) iliyotolewa Jumanne ilisema vita hivyo vilikuwa vimegharimu dola bilioni 38 kufikia tarehe 1 Agosti na vitaendelea kuongeza gharama za takriban dola bilioni 3 kwa mwezi kulingana na ukali wa mzozo huo.

Maelezo hayo mapya ya Ijumaa, yaliyoonekana na shirika la habari la The Associated Press na kuripotiwa awali na Punchbowl News, pia yalionyesha matumizi endelevu ya silaha na zana za kivita za gharama kubwa na vikosi vya Marekani.

Gharama za silaha zilipanda kwa zaidi ya dola bilioni 6 ndani ya muda mfupi zaidi ya mwezi mmoja, kutoka dola bilioni 21.7 zilizoorodheshwa katika ripoti ya CBO hadi dola bilioni 28.1 katika makadirio ya Kamandi Kuu ya Marekani.

Gharama ya kifedha ni kipimo kimoja tu cha athari za vita dhidi ya Iran, ambavyo pia vinaathiri bei ya mafuta na soko la hisa na kusababisha vifo na majeraha kwa askari wa Marekani.

Idadi ya vifo na uchaguzi wa katikati ya muhula

Gharama za kisiasa zitapimwa katika uchaguzi wa katikati ya muhula wa Bunge mwezi Novemba, huku Warepublican wakikabiliwa na changamoto zinazoongezeka kutokana na kutopendwa kwa vita hivyo.

Maelezo ya ukurasa mmoja kutoka jeshi la Marekani kwenda Bungeni yanajumuisha gharama za uendeshaji wa meli za kivita, ndege na kambi, pamoja na hasara ya vifaa na huduma za matibabu kwa askari.

Hasara ya maisha na majeraha iliyorekodiwa na Pentagon inajumuisha vifo vya watu 18 na majeruhi zaidi ya 830, kulingana na Mfumo wa Uchambuzi wa Hasara za Kijeshi (Defense Casualty Analysis System).

Ripoti hiyo haijumuishi uharibifu wa kambi za Marekani katika Mashariki ya Kati, ambazo Tehran imezishambulia kwa makombora ya balistiki na ndege zisizo na rubani (drones).

Ripoti kutoka kwa mkaguzi mkuu wa Pentagon iliyotolewa Jumatatu ilisema mashambulizi ya Iran yameharibu na kubomoa mamia ya majengo na miundo mingine katika kambi za Marekani nchini Kuwait, Bahrain, Qatar, Falme za Kiarabu, Saudi Arabia, Iraq, Oman na Jordan.

Katika ripoti hiyo mpya kwa Bunge, kiasi cha fedha kilichotumika kwa silaha na zana za kivita kilikuwa kikubwa zaidi, kikichukua zaidi ya nusu ya gharama zote.

Silaha za kisasa ambazo zimehitajika zaidi ni mifumo ya kujilinda ya kudungua makombora, kama vile ile inayorushwa na mifumo ya Patriot na THAAD ya Jeshi la Marekani. Kupungua kwa akiba hiyo pia kumezua wasiwasi barani Ulaya, ambapo maafisa wa Marekani na NATO wameiambia AP kuwa kuna uhaba wa makombora ya kuzuia mashambulizi ya anga ambao umefikia kiwango "kikubwa zaidi ya hatari."