Tirada dadka u geeriyooday cudurka Ebola ee Afrika ayaa Arbacadii kor u dhaaftay 1,000 qof, iyadoo cudurku uu ku fiday Jamhuuriyadda Dimuqraadiga ah ee Congo iyo Uganda, sida ay sheegeen saraakiisha caafimaadka.
Xogta Wasaaradda Caafimaadka ee Jamhuuriyadda Dimuqraadiga ah ee Congo ayaa muujisay in tirada kiisaska la xaqiijiyay ay gaartay 2,473, kuwaas oo ay ku jiraan 999 dhimasho, tan iyo markii cudurka lagu dhawaaqay 15-kii May.
Ilaa 20-kii Luulyo, waxaa go'doon ama isbitaallo ku jiray 737 bukaan, halka 482 qof ay ka bogsadeen cudurka.
Fayrasku wuxuu saameeyay shan gobol oo kala ah Haut-Uele, Ituri, Waqooyiga Kivu, Koonfurta Kivu iyo Tshopo.
Dhanka kale, Uganda waxay diiwaangelisay 20 kiis oo la xaqiijiyay, oo ay ku jiraan laba dhimasho, taas oo tirada guud ee dhimashada labada dal ka dhigaysa 1,001 qof.
Sida ay sheegtay hay'adda Save the Children, dillaaca cudurka ayaa saameyn ba'an ku yeeshay carruurta.
Hay'addu waxay bayaan ay Arbacadii soo saartay, iyadoo soo xiganaysa xogta dowladda, ku sheegtay in 476 carruur ah la xaqiijiyay inay qaadeen cudurka, halka in ka badan 189 carruur ah ay u dhinteen tan iyo markii uu dillaacu billowday.
Carruurta horeyba ugu barakacay colaadaha ka socda Congo, ayuu ururku sheegay, dillaaca Ebola wuxuu u horseeday dhibaato labaad, isagoo ku reebay cabsi, walbahaar iyo rajo la'aan.
“Carruurta ku nool Ituri waxay xambaarsan yihiin culays nafsiyeed oo aad u weyn. Qaar badan waxay goob joog u noqdeen rabshado, waxay lumiyeen dad ay jeclaayeen sababo la xiriira dillaaca Ebola ama waxay soo mareen barakac soo noqnoqday,” ayuu yiri Babou Rukengeza, Madaxa Jawaabta Ebola ee Save the Children ee Congo.
Agaasimaha Guud ee Xarunta Afrika ee Xakamaynta iyo Ka Hortagga Cudurrada (Africa CDC), Jean Kaseya, ayaa Talaadadii mar kale ugu baaqay hoggaamiyeyaasha Afrika iyo saaxiibada caalamka inay ururiyaan ugu yaraan 1.4 bilyan oo doollar si loo xoojiyo dadaallada lagula tacaalayo dillaaca cudurka ee qaaradda.
Isagoo ka hadlayay kalfadhi ka tirsan Golaha Midowga Afrika oo ka dhacay caasimadda Ghana ee Accra, Kaseya wuxuu sheegay in miisaaniyadda loogu talagalay la tacaalidda Ebola ay ka korortay qiyaastii hore ee ahayd 518 milyan oo doollar, iyadoo uu sii xumaanayo dillaaca cudurka.
Kooxda Bangiga Horumarinta Afrika ayaa toddobaadkan ku dhawaaqday deeq dhan 13 milyan oo doollar si loo taageero dadaallada lagula tacaalayo cudurka loona xoojiyo tallaabooyinka ka hortagga ee Jamhuuriyadda Dimuqraadiga ah ee Congo, Koonfurta Suudaan iyo Uganda.
