Guddoomiyaha Golaha Madaxbannaanida Suudaan, Abdel Fattah al-Burhan, ayaa Talaadadii ballanqaaday inuu sii wadi doono ololaha militari ee ka dhanka ah Ciidamada Gurmadka Degdegga ah (RSF) ilaa dib loola wareegayo “taako kasta” oo dalka ka mid ah, sida ay warbaahintu sheegtay.
Al-Burhan ayaa hadalkan jeediyay isagoo la hadlayay isu-soo-bax dadweyne oo ka dhacay Tuulada 5-aad ee deegaanka Merowe ee Gobolka Waqooyi, sida ay sheegtay Wakaaladda Wararka Suudaan.
Wuxuu mar kale xaqiijiyay go’aanka ciidamada qalabka sida ee ah inay sii wadaan “xalka militari” ilaa dalka oo dhan laga sifeeyo RSF.
Wuxuu ku celiyay mowqifka dowladda iyo milatariga ee diidmada wadaxaajood lala galo RSF, isagoo sheegay in dadaallada lagu soo celinayo amniga iyo xasilloonida laguna ilaalinayo midnimada Suudaan ay sii socon doonaan.
Dowladda ayaa marar badan diidday heshiis siyaasadeed oo lala gaaro RSF oo ay sheegtay inuu “dowlad madax-bannaan iyo maleeshiyo fallaago ah” isku heer ka dhigayo.
Waxay ku adkeysanaysaa in xabbad-joojin ama wadahadal kasta lagu saleeyo shuruudo ay ka mid yihiin in RSF ay ka baxdo magaalooyinka iyo hay’adaha dadweynaha, hubkana wareejiso, ciidamadeeda dib loogu ururiyo xeryo loo asteeyay, isla markaana lala xisaabtamo dadka lagu eedeeyay xadgudubyada.
Suudaan waxaa tan iyo bishii Abriil 2023 ka socda dagaal u dhexeeya ciidamada dalka iyo RSF, kaas oo ka dhashay khilaaf la xiriira ku biirinta ciidamada RSF milatariga.
Colaadda ayaa qaybo ka mid ah dalka ka abuurtay xaalado macluul ah, waxay dishay tobannaan kun oo qof, waxayna barakicisay 13 milyan oo qof, taasoo abuurtay mid ka mid ah dhibaatooyinka bani’aadannimo ee ugu daran dunida.
