Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa Khamiistii shir-guddoomiyey kulanka Golaha Wasiirrada ee Xukuumadda Federaalka Soomaaliya, kaas oo lagu falanqeeyay xaaladda amniga dalka, geeddi-socodka doorashooyinka madaxa-bannaan iyo horumarinta nidaamka dimuqraadiyadda.
Intii uu socday kulanka, Golaha Wasiirrada ayaa loo soo bandhigay warbixinno ku saabsan hawlgalladii ugu dambeeyay ee Ciidamada Qalabka Sida, kuwaas oo lagu sheegay inay guulo la taaban karo ka gaareen la dagaallanka Khawaarijta, isla markaana ay dhabar-jab ku gaarsiiyeen kooxaha argagixisada.
Goluhu waxa uu sidoo kale meel mariyey Hindise-sharciyeedka Diiwaangelinta iyo Rukhsad-siinta Ganacsiyada, iyo Heshiis Is-afgarad u dhexeeya Agaasinka Guud ee Arrimaha Diinta ee Madaxtooyada Turkiga iyo Wasaaradda Awqaafta iyo Arrimaha Islaamka ee Jamhuuriyadda Federaalka Soomaaliya, kaas oo lagu xoojinayo iskaashiga labada dhinac ee arrimaha diinta iyo horumarinta hay’adaha.
