'Yan tawayen Houthi na Yemen sun gargaɗi kamfanonin jigilar kaya ta ruwa da kada su yi lodi ko sauke kaya a tashoshin jiragen ruwa na Saudiyya, suna masu cewa duk jirgin da ya karya wannan umarni na iya zama abin hari "a duk inda yake."

Gargaɗin na ƙunshe ne a cikin wata wasiƙar imel da cibiyar Humanitarian Operations Coordination Center (HOCC) ta Houthi ta aike wa kamfanonin jigilar kaya, wadda kamfanin dillancin labarai na Reuters ya gani.

A ranar Litinin ne Houthi ta ayyana takunkumin ruwa kan Saudiyya, lamarin da ka iya buɗe wani sabon fagen rikici yayin yaƙin da ke tsakanin Amurka da Iran, tare da ƙara barazana ga samar da makamashi da kasuwancin duniya.

A cikin imel ɗin, Houthi sun ce:

Sun kuma buƙaci kamfanonin su yi taka-tsantsan a duk harkokinsu, suna mai cewa sabon umarnin ya fara aiki daga 12:01 GMT na ranar 20 ga Yuli.

Houthi sun yi gargaɗin cewa duk jirgin da ya karya wannan umarni zai iya fuskantar takunkumi, kuma na iya zama abin hari a duk wurin da sojojin Yemen za su iya kai farmaki.

Masana sun ce idan aka toshe mashigar kudancin Tekun Bahar Maliya (Red Sea), hakan zai katse wata muhimmiyar hanyar da Saudiyya ke amfani da ita a matsayin madadin mashigar Hormuz, tare da ƙara fargabar ƙarancin kayayyaki da makamashi.

Harkokin zirga-zirgar jiragen ruwa a Bahar Maliya ba su dawo yadda suke ba tun bayan da Houthi suka fara kai hare-hare kan jiragen kasuwanci a watan Nuwamban 2023, abin da suka ce suna yi ne domin nuna goyon baya ga Falasɗinawa a Gaza.

A makon da ya gabata, Houthi sun zargi Saudiyya da kai hari ta sama kan filin jirgin saman Sanaa, sannan suka harba makamai masu linzami zuwa cikin ƙasar Saudiyya, lamarin da ya kawo ƙarshen shekaru na zaman ɗan kwanciyar hankali.

Sai dai Saudiyya ba ta mayar da martani kan zargin ba. A maimakon haka, gwamnatin Yemen da ƙasashen duniya suka amince da ita ce ta ɗauki alhakin harin, tana mai cewa ta kai shi ne domin hana wani jirgin sama daga Iran sauka a filin jirgin saman Sanaa.