Hukumomin yada labarai na Iran sun ce Amurka ba ta yi wani muhimmin sassauci ba a cikin martaninta na baya-bayan nan ga buƙatar da Iran ta gabatar don tattaunawar kawo karshen yakin.

Kamfanin dillancin labarai na Fars a ranar Lahadi ya ce Amurka ta gabatar da jerin abubuwa guda biyar, waɗanda suka haɗa da bukatar cewa Iran ta bar tashar nukiliya guda ɗaya tal ta rinƙa aiki da kuma mika tarin uranium ɗin da take da shi wanda aka yi matuƙar ingantawa zuwa Amurka.

A cewar Fars, Amurka ta kuma ƙi sakin "ko da kashi 25 cikin 100" na dukiyoyin Iran da aka ƙwace a ƙasashen waje ko biyan diyya kan ɓarnar da aka yi wa Iran a lokacin wannan yakin, wanda ya barke a ranar 28 ga Fabrairu.

Rahoton ya ƙara da cewa Amurka ta sanya sharadin kawo ƙarshen yaƙin daga dukkanin ɓangarori a bayan fara tattaunawa.

A nata bangaren, kamfanin dillancin labarai na Mehr ya ce: "Amurka, ba tare da bayar da wani sassauci na zahiri ba, tana son samun sassaucin da ba ta samu ba yayin yakin, wanda hakan zai kai ga jinkiri a tattaunawar."

A cikin tayin da ta gabatar, Iran ta buƙaci a kawo ƙarshen yakin a dukkan fuskoki, ciki har da yakin Isra'ila kan Lebanon, kazalika a dakatar da kulle-kullen rundunar ruwa ta Amurka a tashoshin jiragen ruwa na Iran da aka kafa tun ranar 13 ga Afrilu.

Haka kuma, a cewar ma'aikatar harkokin waje ta Iran a wata ganawar manema labarai makon da ya gabata, ta nemi a sassauta duk takunkumin Amurka da kuma sakin dukiyoyin Iran da aka ƙwace a ƙasashen waje saboda takunkuman Amurka.

Fars ya ce tayin na Iran ya jaddada cewa Tehran za ta ci gaba da kula da Mashigar ta Hormuz, wata muhimmiyar hanya ta makamashi da ta rufe kusan gaba ɗaya tun farkon wannan yakin.

A ranar Lahadi, mai magana da yawun rundunar sojin Iran, Abolfazl Shekarchi, ya yi gargaɗi ga Shugaban Amurka Donald Trump da kada ya sake fara kai wani sabon hari kan Iran.