Wata kotu a Kenya ta gurfanar da ɗalibai mata takwas a ranar Laraba kan zargin kisan ɗalibai 16 da suka mutu sakamakon gobarar da ta tashi a ɗakin kwanan makaranta a yankin Rift Valley a ƙarshen watan Mayu, kamar yadda ofishin babban mai gabatar da ƙara na ƙasar ya bayyana.

'Yanmatan sun rasa rayukansu ne bayan gobara ta tashi a ɗakin kwanan makarantar Utumishi Girls' Academy Senior School da ke garin Gilgil, a gundumar Nakuru da ke yammacin tsakiyar Kenya.

Gobarar ta kuma jikkata wasu ɗalibai 79. Yawancin ɗaliban makarantar na da shekaru tsakanin 15 zuwa 18.

Waɗanda ake tuhuma su takwas sun gurfana a gaban Alƙaliya Diana Kavedza ta Babbar Kotun Kibera da ke Nairobi, inda dukkansu suka musanta zargin da ake musu, a cewar Daraktan Hukumar Gabatar da Ƙara ta Ƙasa a cikin wata sanarwa da ya wallafa a shafinsa na X.

Sai dai masu gabatar da ƙara ba su bayyana ƙarin bayani kan shari'ar ba zuwa yanzu.

Muhawara kan tsaron makarantu

Wannan gobara ta sake tayar da muhawara kan matakan tsaro a makarantun kwana na Kenya, da kuma yawaitar tarzomar ɗalibai a tsarin ilimin ƙasar.

Bincike ya nuna cewa gobara na yawan faruwa a makarantun Kenya, inda a lokuta da dama ɗalibai ke kunna wuta domin nuna rashin amincewa da tsauraran dokokin makaranta ko kuma rashin ingantattun yanayin rayuwa.

Kenya ta sha fuskantar gobarar makarantu da ta yi sanadin asarar rayuka. A shekarar 2024, gobara a makarantar Hillside Endarasha Academy da ke gundumar Nyeri ta kashe yara 21.

Mummunar gobarar makaranta mafi muni a tarihin baya-bayan nan ita ce ta shekarar 2001, lokacin da ɗalibai maza 67 suka mutu a makarantar Kyanguli Secondary School da ke wajen Nairobi. Hukumomi sun ce gobarar ta samo asali ne daga ƙona makarantar da gangan.

Ministan Ilimi na Kenya, Julius Ogamba, ya ce a watan Mayu cewa rikice-rikicen da suka biyo bayan wannan lamari sun sa aka rufe akalla manyan makarantu 204 na ɗan lokaci a faɗin ƙasar.

Yawancin makarantun, ciki har da Utumishi Girls' Academy Senior School, sun koma ci gaba da karatu.