Mapigano kati ya jeshi la Ethiopia na waasi wa Tigray yamesitishwa, vyanzo vya ndani na vya usalama viliiambia AFP siku ya Jumapili, kufuatia kuzuka kwa makabiliano ya silaha karibu na mpaka na Sudan.

"Hali imetulia," alisema mwanachama mmoja wa chama cha Tigray People's Liberation Front (TPLF) kwa sharti la kutotajwa jina, bila kutoa takwimu zozote za majeruhi au vifo.

Mapigano yaliyohusisha silaha nzito na ndege zisizo na rubani (drones) yalianza huko Shererina mwendo wa saa 12:00 usiku wa Jumamosi na kumalizika mwendo wa saa tano mchana, waliongeza kusema.

Chanzo cha usalama, ambacho pia kiliomba jina lake lisitajwe, kilithibitisha kuwa mapigano yamesimama.

Kuongezeka kwa mvutano

Siku ya Jumamosi, TPLF—ambayo imeondolewa kwenye orodha ya vyama vya siasa lakini bado ina ushawishi mkubwa katika eneo hilo—iliishutumu serikali kuu kwa kuchochea kuongezeka kwa mvutano.

Hakukuwa na majibu ya haraka kutoka kwa mamlaka za serikali kuu.

AFP haijaweza kuthibitisha kwa kujitegemea madai ya TPLF au kubaini ni vikosi vipi vilivyokuwepo eneo la tukio huko Shererina.

Mapigano yamekuwa yakitokea katika eneo lenye utata la magharibi mwa Tigray, ambalo linadhibitiwa na wazalendo kutoka jimbo jirani la Amhara.

Vita vya maangamizi

Vikosi vya serikali kuu na vile vya Tigray vimekuwa vikijikusanya kwa miezi kadhaa kando ya mpaka wa kaskazini mwa Tigray, kaskazini mwa Ethiopia.

Hofu ya vita vipya imeongezeka kutokana na hali hiyo, ikiwa ni chini ya miaka minne tangu kumalizika kwa vita vya maangamizi kati ya pande hizo mbili.

Vita hivyo vilisababisha vifo vya takriban watu 600,000, kulingana na makadirio ya Umoja wa Afrika.