Ichraf Chebil Saied amekuwa mke wa Rais wa Tunisia, Kais Saied, tangu Oktoba 23, 2019, wakati mume waawe alipoapishwa kuwa Rais.

Ingawa Ichraf Saied hutajwa sana kama Mke wa Rais wa Tunisia, nafasi hiyo haitambuliwi rasmi kama ofisi ya kikatiba au ya serikali nchini Tunisia. Kwa hiyo, hana mamlaka wala majukumu rasmi ya serikali yanayotokana na cheo hicho.

Ichraf Saied alizaliwa nchini Tunisia mwaka 1973.

Baba yake, Mohamed Chebil, alikuwa hakimu katika Mahakama ya Rufaa iliyopo mji mkuu wa Tunis.

Alisomea sheria katika Kitivo cha Sheria na Sayansi za Siasa katika Chuo Kikuu cha Sousse, na baadaye akapata shahada ya uzamili katika masuala ya uhalifu kutoka Taasisi ya Juu ya Usimamizi wa Mahakama.

Ichraf alikutana na Kais Saied alipokuwa akisomea sheria, wakati huo Kais Saied alikuwa mkufunzi wa sheria ya kikatiba.

Anajulikana zaidi kama mtaalamu wa mahakama na hakimu, na si mwanasiasa.

Mwaka 2020, alipandishwa cheo na kuwa katika nafasi ya tatu katika mfumo wa mahakama, na kuhamishiwa Mahakama ya Rufaa ya Sfax.

Ichraf Saied anajulikana kwa kuishi maisha ya faragha na kutokuwa sana hadharani, ikilinganishwa na baadhi ya wake wa marais waliomtangulia nchini Tunisia.

Historia yake ya kufanya kazi katika mfumo wa mahakama inamtofautisha na wake wengi wa marais ambao shughuli zao za umma zimekuwa zikihusisha zaidi katika siasa, na masuala ya kijamii.

Hata hivyo, amewahi kuandamana na Rais Saied katika baadhi ya shughuli rasmi na kuhudhuria matukio yanayohusiana na masuala ya wanawake pamoja na shughuli za kidiplomasia za Tunisia.

Ichraf Saied na Rais Kais Saied wana watoto watatu.