Benki ya Dunia imeonya kuwa Wakenya wako katika hatari ya kukumbana na hali ngumu zaidi za kiuchumi katika miezi ijayo, huku hadi watu milioni 2.4 wakitabiriwa kutumbukia kwenye umaskini kufikia mwisho wa mwaka 2026.

Kwa mujibu wa Benki ya Dunia, ongezeko la hivi karibuni la bei za vyakula, usafiri na mafuta linaweza kufuta mafanikio ambayo Kenya imepata katika kupunguza umaskini, hasa katika maeneo ya mijini.

Katika ripoti yake ya hivi karibuni ya Kenya Economic Update, benki hiyo imeeleza kuwa mzozo unaoendelea Mashariki ya Kati umeongeza shinikizo la mfumuko wa bei kutokana na kuvurugika kwa soko la nishati duniani na kupanda kwa bei ya mafuta.

Ripoti hiyo, iliyotolewa Alhamisi, Julai 9, inaeleza kuwa kupanda kwa bei ya mafuta kumeongeza pia gharama za usafirishaji wa bidhaa na utoaji wa huduma.

Benki hiyo imeonya kuwa mzozo huo unaweza kuongeza kiwango cha umaskini nchini Kenya kwa asilimia kati ya pointi 2 hadi 4.5, hali ambayo inaweza kusababisha Wakenya kati ya milioni 1 na milioni 2.4 zaidi kuishi chini ya kiwango cha kimataifa cha umaskini ifikapo mwisho wa mwaka 2026.

Akizungumza wakati wa uzinduzi wa ripoti hiyo, Mchumi Kiongozi wa Benki ya Dunia, Tom Bundervoet, alisema athari za muda mrefu za mzozo huo zinaweza kuongeza kwa kiasi kikubwa viwango vya umaskini nchini Kenya.

Mzozo huu unaweza kuongeza kiwango cha umaskini nchini Kenya kwa asilimia kadhaa, jambo ambalo linaweza kusababisha Wakenya milioni moja au hata milioni mbili zaidi kuishi chini ya mstari wa umaskini," alisema Bundervoet.

Ili kuisaidia Kenya kukabiliana na changamoto hiyo inayokaribia, Benki ya Dunia imeitaka serikali kuharakisha uundaji wa ajira rasmi, ikisema soko la ajira nchini halina uwezo wa kuchukua idadi kubwa ya watu wanaotafuta kazi kila mwaka.

Benki hiyo imebainisha kuwa ingawa takribani Wakenya 800,000 huingia katika soko la ajira kila mwaka, ni karibu watu 100,000 pekee wanaopata ajira rasmi, huku wengi wakibaki katika ajira zisizo rasmi au zenye kipato cha chini.

Aidha, Benki ya Dunia imepunguza makadirio yake ya ukuaji wa uchumi wa Kenya, ikitabiri kuwa uchumi utakua kwa asilimia 4.3 mwaka 2026 na asilimia 4.4 mwaka 2027, kiwango cha chini kuliko makadirio yake ya awali yaliyotolewa Novemba mwaka jana.

Mbali na mzozo wa Mashariki ya Kati, Benki ya Dunia imezitaja pia athari za mabadiliko ya tabianchi pamoja na kuongezeka kwa hali ya sintofahamu ya kisiasa kuelekea Uchaguzi Mkuu wa mwaka 2027 kuwa miongoni mwa hatari zinazoweza kudhoofisha utendaji wa uchumi wa Kenya.