Ushirikiano wenye tija wa Uturuki na Afrika Umuhimu wa dhamira ya Uturuki kwa Afrika umezidi kuongezeka katika miaka ya hivi karibuni kutokana na mjumuisho wa mikakati ya kiuchumi na kidiplomasia. Moja wapo ya sababu kuu ya Uturuki kushirikiana na Afrika ni kutokana na ukuaji wa uchumi wa bara. Katika moja wapo ya alama za kukua kwa ushirikiano, ni mkataba kati ya kampuni ya Uganda na Uturuki, Yapi Merkezi Holdings, wa kujenga njia ya reli yenye urefu wa kilomita 272. Hii inaashiria hatua muhimu katika kuboresha miundombinu ya usafiri katika eneo hilo la Afrika Mashariki. Huku kukiwa na ukuaji wa kasi wa soko, Afrika ina fursa nyingi za biashara na uwekezaji. Uturuki ina historia ya muda mrefu na mafungamano ya kitamaduni na nchi za Afrika tangu enzi ya utawala wa Ottoman. Uturuki inalenga kuongeza washirika wake wa kibiashara, kupunguza utegemezi wa masoko ya Ulaya na Asia. Zaidi ya hivyo, Africa imebarikiwa na rasilimali, ikiwemo madini, mafuta, na gesi asilia. Upatikanaji wa rasilimali hizi ni muhimu kwa Uturuki ili kusaidia ukuaji wa uchumi wake na usalama wa nishati. Kudumisha mahusiano na Afrika ni hatua ya kimkakati kukuza ushawishi wa Uturuki katika siasa za dunia na mashirika makubwa kama vile Umoja wa Mataifa. Afrika yenye nchi 54 ni eneo muhimu la upigaji kura katika mashirika hayo, na mahusiano ya karibu na mataifa hayo inaweza kukuza nafasi ya Uturuki kimataifa. Uturuki pia inatumia utamaduni wa diplomasia, misaada ya kibinadamu na miradi ya maendeleo kujenga taswira chanya na kuongeza utashi miongoni mwa nchi za Afrika. Mkakati huu unaisaidia Uturuki kuwa mshirika mwenye kutegemewa Afrika. Hivi ndivyo, ushirika huo wenye kuleta ushindi wa pande zote mbili kati ya Uturuki na Afrika unavyofanya kazi.