Maxkamadda La-dagaallanka Argagixisada ee Suudaan ayaa Axaddii xukun dil toogasho ah ku ridday hoggaamiyaha Ciidamada RSF, Maxamed Xamdaan Dagalo, oo loo yaqaan Hemedti, isagoo maqan, kadib markii lagu helay dambiga dilka Guddoomiyihii hore ee gobolka Galbeedka Daarfuur, Khamis Cabdalla Abakar.
Maxkamadda La-dagaallanka Argagixisada iyo Dambiyada ka Dhanka ah Dowladda ee ku taalla magaalada Port Sudan ayaa sidoo kale xukun dil ah ku ridday ku xigeenka hoggaamiyaha RSF, Cabdiraxiim Xamdaan Dagalo, oo ah walaalka Hemedti, iyo 14 eedeysane oo kale.
Go’aankan ayaa noqonaya xukunkii ugu horreeyay ee maxkamadeed ee lagu rido hoggaamiyaha RSF tan iyo markii uu qarxay dagaalka u dhexeeya ciidamada Suudaan iyo kooxda RSF bishii Abriil 2023.
Maxkamaddu waxay eedeysanayaasha ku heshay dambiyo ay ka mid yihiin dambiyo dagaal, dambiyo ka dhan ah aadanaha, xasuuq (genocide), iyo dambiyo ka dhan ah dadka iyo hantidooda.
Waxay Hemedti ku heshay inuu qorsheeyay isla markaana fuliyay dambiyadaas, halka ku xigeenkiisana lagu helay inuu qorsheeyay kana qayb qaatay.
Eedeysanayaasha kale waxaa ka mid ahaa Algooni Xamdaan Dagalo Muuse (Al-Qoni), oo ah walaal kale oo Hemedti ah; Cabdiraxmaan Jumca, oo ahaa taliyaha RSF ee Galbeedka Daarfuur; iyo hoggaamiyaha beesha Al-Tijaani Al-Daahir Karshoum.
Khamis Cabdalla Abakar ayaa la dilay 14-kii Juun 2023, kadib markii uu RSF ku eedeeyay inay weerarro ku qaaday shacabka rayidka ah ee ku nool caasimadda Galbeedka Daarfuur ee El Geneina. Dowladda Suudaan ayaa kooxda RSF ku eedeysay inay dishay Abakar isla markaana ay jirkiisa dhaawac u geysatay, eedeymahaas oo RSF ay xilligaas beenisay.
Mas’uuliyiinta Suudaan iyo ururrada caalamiga ah ayaa RSF ku eedeeyay inay xasuuqyo baahsan ka geysatay El Geneina, oo ay ku jiraan dilka boqolaal qof iyo barakicinta kumannaan xubnood oo ka tirsan beesha Masalit.
Suudaan waxaa tan iyo Abriil 2023 ka socday dagaal u dhexeeya ciidamada dowladda iyo RSF, kadib muran ka dhashay qorshaha lagu mideynayay ciidamada RSF iyo kuwa dowladda. Colaaddan ayaa dhalisay mid ka mid ah dhibaatooyinka bani’aadannimo ee ugu daran dunida, iyadoo ay ku dhinteen tobannaan kun oo qof, isla markaana ay ku barakaceen malaayiin kale.
