Wasiirka Arrimaha Dibadda ee Ruushka, Sergey Lavrov, ayaa gaaray caasimadda Itoobiya ee Addis Ababa, isagoo billaabay safar uu ku marayo dalal Afrikaan ah, sida ay fiidnimadii Isniinta baahisay warbaahinta dowladda Ruushka.
Wakaaladda wararka ee dowladda Ruushka ee RIA, oo soo xiganeysay weriyaheeda, ayaa sheegtay in Lavrov uu gaaray Addis Ababa, halkaas oo la filayo inuu Talaadada kula kulmo hoggaamiyeyaasha Itoobiya, oo uu ku jiro Wasiirka Arrimaha Dibadda, Gedion Timothewos.
Warbixintu waxay sheegtay in mid ka mid ah qodobbada ugu muhiimsan ee wada hadallada Lavrov uu la yeelan doono mas’uuliyiinta Itoobiya ay noqon doonto dhismaha warshad weyn oo tamarta nukliyeerka ah oo laga hirgelinayo dalka Itoobiya.
Ganacsiga ayaa sidoo kale la filayaa inuu noqdo mowduuc muhiim ah, iyadoo warbixintu xustay in Lavrov iyo dhiggiisa Itoobiya ay kulankoodii sanadkii hore kaga wada hadleen ganacsiga labada dal iyo sidii loo ballaarin lahaa.
Warbixintu waxay intaas ku dartay in booqashada Lavrov ee Itoobiya ay tahay saldhigga koowaad ee socdaalkiisa dalalka Afrika, iyadoo la xusay inuu markii ugu dambeysay booqday Itoobiya bishii Luulyo 2022.
Ruushka si rasmi ah uma shaacin booqashadan, mana jiro weli war rasmi ah oo lagu faahfaahiyay dalalka kale ee Afrika ee Lavrov booqan doono inta uu socdaalkiisa ku jiro.
