Wasiirka Caafimaadka iyo Daryeelka Bulshada ee Jamhuuriyadda Federaalka Soomaaliya, Dr. Cali Xaaji Aadan, oo matalayay Madaxweynaha Jamhuuriyadda Federaalka Soomaaliya, Xassan Sheekh Maxamuud, ayaa ka qayb galay Kalfadhiga Gaarka ah ee Golaha Midowga Afrika ee Arrimaha Caafimaadka Afrika, kaas oo ka dhacay magaalada Accra, halkaas oo hoggaamiyeyaasha qaaradda ay kaga doodayeen xaaladda caafimaadka Afrika iyo sida loo horumarin karo.

Shirka waxaa martigeliyay Madaxweynaha Jamhuuriyadda Ghana, John Dramani Mahama, waxaana guddoominayay Madaxweynaha Jamhuuriyadda Burundi ahna Guddoomiyaha Midowga Afrika, Evariste Ndayishimiye. Ajandaha shirka waxaa ka mid ahaa xoojinta nidaamyada caafimaadka Afrika, hirgelinta Daryeelka Caafimaadka Aasaasiga ah, gaarista himilada ciribtirka AIDS-ka marka la gaaro 2030, dhimista dhimashada laga hortagi karo ee hooyooyinka iyo carruurta, dardargelinta la tacaalidda cudurrada faafa iyo kuwa aan faafin, iyadoo dhammaan qodobadaas ay saldhig u ahayd horumarinta Caymiska Caafimaadka ee Dadka Wada Gaara (Universal Health Coverage).

Khudbaddiisii, wasiirku wuxuu sheegay in Soomaaliya ay Daryeelka Caafimaadka Aasaasiga ah ka dhigtay mudnaan qaran, iyadoo u aragta saldhigga lagu dhisayo adeegyo caafimaad oo tayo leh, loo siman yahay, isla markaana gaara dhammaan bulshada. Wuxuu faahfaahiyay dib-u-habaynta ay Dowladda Federaalka ka waddo xarumaha caafimaadka, tayeynta shaqaalaha caafimaadka, adeegyada bulshada, nidaamyada caafimaadka dhijitaalka ah iyo u diyaar-garowga xaaladaha degdegga ah. Sidoo kale, wuxuu caddeeyay taageerada buuxda ee Soomaaliya ay u hayso Baaqa Accra iyo himilada Midowga Afrika ee dhismaha nidaamyo caafimaad oo adkaysi leh, isagoo ugu baaqay dalalka Afrika inay xoojiyaan iskaashiga, maalgelinta gudaha iyo is-garab istaagga si loo gaaro caafimaad loo siman yahay iyo horumar waara.

Guddoomiyaha Guddiga Midowga Afrika, Mahmoud Ali Youssouf, oo jeediyay khudbadda furitaanka, ayaa ku baaqay in Afrika ay ka gudubto marxaladda ballanqaadyada una gudubto hirgelinta qorshayaasha caafimaadka. Wuxuu sheegay in Tubta Midowga Afrika ee 2030 iyo Wixii Ka Dambeeya ay tahay qorshaha hirgelinta ee qaaradda, kaas oo loogu talagalay ciribtirka AIDS-ka, baabi’inta dhimashada laga hortagi karo ee hooyooyinka iyo carruurta, la dagaallanka cudurrada faafa iyo kuwa aan faafin, xoojinta nidaamyada caafimaadka ee adkaysiga leh iyo horumarinta Caymiska Caafimaadka ee Dadka Wada Gaara. Wuxuu carrabka ku adkeeyay in madaxbannaanida caafimaadka Afrika ay ku xirnaan doonto maalgelin gudaha ah oo xooggan, soo saarista dawooyinka iyo tallaallada gudaha Afrika, nidaamyo sharciyeed oo adag, cilmi-baaris iyo hal-abuur, iyo hoggaan siyaasadeed oo joogto ah.

Soomaaliya waxay Accra la tagtay waxqabad la jaanqaadaya ajandahaas, halkii ay ku ekaan lahayd taageeradiisa. Bishan gudaheeda oo keliya, Wasiirka Caafimaadka ayaa Madasha Maalgashiga Caafimaadka Gobolka ee Nouakchott ka jeediyay aragti ku saabsan iskaashiga gobolka, soo saarista dawooyinka gudaha iyo maalgelin caafimaad oo waarta, kuwaas oo si dhow ula jaanqaaday mudnaanta madaxbannaanida caafimaadka ee Guddoomiyaha Guddiga Midowga Afrika uu shirka ku soo bandhigay.

Gudaha dalka isla muddadaas, Wasaaradda Caafimaadka ayaa, iyadoo kaashanaysa Gavi, Ururka Caafimaadka Adduunka (WHO) iyo UNICEF, bilowday Barnaamijka Qaranka ee Tababarka Tababarayaasha ee tallaalka, si loo dhiso khubaro gaarsiin doona aqoonta tallaalka dhammaan Dowlad Goboleedyada xubnaha ka ah Dowladda Federaalka.

Taas macnaheedu waa in mowqifyadii Soomaaliya ay ka muujisay Accra ay yihiin kuwo ay horey u billowday hirgelintooda.

Dal dib u dhis ku wada nidaamkiisa caafimaad sida Soomaaliya, mudnaanta la siinayo Daryeelka Caafimaadka Aasaasiga ah waa doorasho istaraatiiji ah. Inkastoo isbitaallada takhasuska leh iyo adeegyada caafimaadka casriga ahi muhiim yihiin, haddana caafimaadka shacabka waxaa inta badan lagu go'aamiyaa heerka adeegyada aasaasiga ah, sida rugaha caafimaadka ee tallaala carruurta, si badbaado leh uga qayb qaata dhalmada sidoo kale daweeya cudurrada ka hor inta aysan isu beddelin xaalado halis ah.

Mudnaanta la siiyo adeegyadaas ayaa ah habka ugu wax-ku-oolsan ee dalalka leh kheyraad xaddidan ay ku gaarsiin karaan adeeg caafimaad dadka ugu badan, waana sababta mabda'aas uu saldhig ugu yahay dib-u-habaynta caafimaadka Soomaaliya iyo ajandaha qaaradda ee lagu heshiiyay Accra.

Shirku wuxuu sidoo kale xoogga saaray muhiimadda maalgelinta gudaha, maadaama nidaamyada caafimaadka ee ku tiirsan deeqaha dibadda ay u nugul yihiin isbeddellada deeq-bixiyeyaasha, halka adkaysigu uu ku imaan karo kheyraadka Afrika oo loo huro caafimaadka Afrika.

Sida shir kasta oo kale, qiimaha shirka Accra waxaa lagu cabbiri doonaa waxa ka dhasha. Guddoomiyaha Guddiga Midowga Afrika ayaa si cad ugu sheegay hoggaamiyeyaasha:

“Jiilalka mustaqbalka waxay Shirkan ku xusuusan doonaan, ma aha khudbadihii aan jeedinnay, balse haddii aan beddelnay jihada caafimaadka Afrika.”

Soomaaliya waxay shirka uga baxday sidii ay ku timid; iyadoo mudnaanteeda caddeysay, dib-u-habaynteedii caafimaadna ay socoto, isla markaana si buuxda u taageertay Baaqa Accra. Haatan shaqada lagu xaqiijinayo himiladaas waxay ka socotaa xarumaha caafimaadka, goobaha tababarka iyo rugaha caafimaadka degmooyinka ee Soomaaliya iyo guud ahaan Afrika.