Hay’adda Caalamiga ah ee Socdaalka (IOM) ee Qaramada Midoobay ayaa Axaddii ka digtay in magaalada Al Obeid, oo ah caasimadda gobolka Waqooyiga Kordofan ee Suudaan, ay la kulmi karto masiir la mid ah kii Al Fasher ee gobolka deriska la ah ee Waqooyiga Darfur haddii ay sii socdaan weerarrada ay geysanayaan ciidamada gurmadka degdegga ah ee RSF.
Digniintan ayaa timid kadib muuqaal ay IOM ku baahisay barta X, kaas oo uu kaga hadlayay Mohamed Refaat, madaxa howlgalka hay’adda ee Suudaan.
“Dhammaanteen waxaan ka walaacsannahay in Al Obeid ay noqoto Al Fasher-ta xigta... Haddii aynaan hadda tallaabo qaadin, waxaan arki doonnaa Al Fasher kale,” ayuu yiri Refaat.
Wuxuu intaas ku daray in in ka badan 500,000 oo qof oo ku nool Al Obeid ay u baahan yihiin gargaar bani’aadannimo.
Tacaddiyo
Refaat ayaa sidoo kale sheegay in kooxda hoyga ee Suudaan (Shelter Cluster), oo ay hoggaamiso IOM, ay tahay “mid ka mid ah kooxaha ugu yar ee maalgelinta ka hela Suudaan,” taasoo xaddidaysa awooddeeda ay ku caawin karto qoysaska ay saameeyeen colaaddu.
Muddo ku dhow hal bil, Al Obeid waxaa si isdaba joog ah u beegsanayay weerarro diyaaradaha aan duuliyaha lahayn ee RSF, kuwaas oo lagu bartilmaameedsaday saldhigga weyn ee korontada magaalada, xarumaha shidaalka iyo goobo kale oo rayid ah, iyadoo ay ku dhinteen kuna dhaawacmeen tobannaan qof.
Jimcihii, Qaramada Midoobay ayaa ka digtay masiibo cusub oo dhinaca xuquuqda aadanaha ah oo ka taagan Al Obeid, waxayna ugu baaqday RSF inay joojiso weerarrada ay ku hayso magaalada.
Digniintan ayaa daba socotay walaac isa soo taraya oo ay muujiyeen Qaramada Midoobay, ururrada gobolka iyo Mareykanka oo ku saabsan wararka sheegaya isu-urursiga ciidamada RSF ee ku hareeraysan Al Obeid iyo halista ay ka dhalan karaan tacaddiyo baaxad leh.
Xadgudubyo
Sida ay sheegeen hay’ado maxalli ah iyo kuwo caalami ah, qabsashadii RSF ee Al Fasher 26-kii Oktoobar 2025 ayaa waxaa xigtay warar sheegaya xadgudubyo baahsan oo loo geystay dadka rayidka ah iyo digniino muujinaya in arrintaasi sii xoojin karto kala qaybsanaanta juqraafiyeed ee Suudaan.
29-kii Oktoobar 2025, taliyaha RSF, Mohamed Hamdan Dagalo, oo loo yaqaan Hemedti, ayaa qirtay in “xadgudubyo” ay ka dhaceen Al Fasher, wuxuuna ku dhawaaqay in la sameeyay guddiyo baaritaan.
Qaramada Midoobay ayaa sidoo kale 12-kii May ka digtay kororka weerarrada diyaaradaha aan duuliyaha lahayn ee ka socda guud ahaan gobolka Kordofan, iyadoo sheegtay in weerarradaasi ay dileen ugu yaraan 880 qof oo rayid ah intii u dhexeysay Janaayo iyo Abriil 2026.
