Xafiiska Qaramada Midoobay ee Isku-duwidda Arrimaha Bani’aadannimada (OCHA) ayaa Axaddii ka digay in weerarrada joogtada ah ee diyaaradaha aan duuliyaha lahayn ay sii xoojinayaan dhibaatada bani’aadannimo ee ka jirta gobolka Kordofan ee Suudaan, halkaas oo shacabka ay la daalaa dhacayaan faafitaanka sii xumaanaya ee daacuunka iyo biyo yari ba’an.
Sida ay sheegtay OCHA, ilo deegaanka ah ayaa soo sheegay in diyaarad aan duuliye lahayn ay Isniintii la soo dhaafay ku beegsatay gaari rayid ah tuulada Al-Shaatut, oo bari ka xigta Jabrat Al-Sheikh ee gobolka Waqooyiga Kordofan, taasoo sababtay dhimasho iyo dhaawac soo gaaray dad rayid ah iyo burbur hantiyeed. Maalintii xigtay, diyaarad kale ayaa la sheegay inay beegsatay gaari biyo sida oo ku sugnaa Hamrat Al-Sheikh, taasoo sababtay khasaaro kale oo soo gaaray rayidka isla markaana sii carqaladaysay helitaanka biyaha muhiimka ah.
OCHA waxay sheegtay in daacuunka uu weli ku sii fidayo guud ahaan gobolka Kordofan, iyadoo bahwadaagta arrimaha bani’aadannimada ay soo sheegeen kiis looga shakisan yahay magaalada Al-Obeid, halkaas oo weerarrada joogtada ah ee diyaaradaha aan duuliyaha lahayn ay hoos u dhigeen biyaha magaalada laga helo ilaa boqolkiiba 20 oo keliya baahideeda.
Hay’adda Caafimaadka Adduunka (WHO) ayaa horay u geysay magaalada Al-Obeid agabkii loogu talagalay ka jawaabista cudurka daacuunka, iyadoo halkaas ka hirgelisay xarun lagu daweeyo dadka uu cudurku haleelo. Dhanka kale, OCHA ayaa sheegtay inay in ka badan 4 milyan oo doollar ka qoondaysay Sanduuqa Gargaarka Bani’aadannimada ee Suudaan si loogu taageero sugnaanta cuntada, nafaqada, adeegyada caafimaadka, biyaha iyo fayadhowrka, adeegyada ilaalinta bulshada iyo hawlaha miinooyinka.
Gobolka deriska la ah ee Koonfurta Kordofan, hay’adda UNICEF ayaa gaarsiisay agab caafimaad degmada Abu Jubaiha si loogu taageero adeegyada caafimaadka degdegga ah iyo kuwa joogtada ah ee qiyaastii 240,000 oo qof, sida ay sheegtay OCHA.
Muddo ka badan bil, magaalada Al-Obeid waxaa ku socday weerarro ay diyaaradaha aan duuliyaha lahayn ee Ciidamada Gurmadka Degdegga ah (RSF) ku beegsanayeen xarunta weyn ee korontada, xarumaha shidaalka iyo goobo kale oo rayid ah, kuwaas oo sababay dhimashada iyo dhaawaca tobannaan qof.
Magaalada Al-Obeid oo markii hore ay ku noolaayeen qiyaastii 500,000 oo qof ayaa tan iyo markaas noqotay xarun weyn oo ay ku soo barakacaan dadka, iyadoo qiyaaso aan rasmi ahayn ay tilmaamayaan in tirada dadka hadda ku nool ay gaartay ku dhowaad 3 milyan.
Suudaan waxaa tan iyo Abriil 2023 ka socday dagaal u dhexeeya ciidamada dowladda iyo Ciidamada Gurmadka Degdegga ah (RSF), kadib muran ka dhashay qorshaha lagu mideynayay ciidamada RSF iyo kuwa dowladda. Dagaalka ayaa sababay mid ka mid ah dhibaatooyinka bani’aadannimo ee ugu daran dunida, isagoo dilay tobannaan kun oo qof isla markaana barakiciyay malaayiin kale.
