Faafitaanka cudurka daacuunka Cholera-ha ee Suudaan ayaa tan iyo bishii May 2026 sababay dhimashada 120 qof, iyadoo la diiwaangeliyay 1102 kiis oo kale oo looga shakisan yahay, kuwaas oo ka dhacay deegaanno dagaalladu go'doomiyeen, sida ay Arbacadii sheegtay Hay’adda Caafimaadka Adduunka (WHO).
In ka badan saddex sano oo dagaal u dhexeeyay ciidamada dowladda Suudaan iyo Ciidamada RSF ayaa si weyn u burburiyay nidaamka caafimaadka dalka.
Tani waa mowjaddii saddexaad ee cudurka daacuunka ee ka dillaaca Suudaan saddexdii sano ee la soo dhaafay, waxayna billaabatay laba bilood kadib markii mowjaddii hore si rasmi ah loo soo afjaray bishii Maarso.
Intii u dhexeysay Luulyo 2024 iyo Maarso 2026, in ka badan 124,400 qof ayaa cudurka qaaday halka 3,500 qof ay u dhinteen, sida ku cad tirakoobka dowladda Suudaan.
Ku dhowaad 300 kiis oo looga shakisan yahay cudurka oo ku sugan Waqooyiga Kordofan
Waxaa la filayaa in toddobaadyada soo socda ay billowdaan roobabka xilli-roobaadka ee Suudaan, xilli ay inta badan sii kordhaan kiisaska daacuunka maadaama malaayiin qof aysan helin biyo nadiif ah, halka roobkuna uu sii adkeeyo gaarsiinta adeegyada iyo gargaarka.
Dowladda Suudaan ayaa toddobaadkan si rasmi ah ugu dhawaaqday faafitaanka cudurka Gobolka Galbeedka Kordofan.
WHO ayaa sheegtay in cudurku u muuqdo mid sii fidaya, kadib markii la soo sheegay ku dhowaad 300 kiis oo looga shakisan yahay iyo saddex dhimasho oo ka dhacay Gobolka deriska la ah ee Waqooyiga Kordofan. Qaramada Midoobay ayaa ka digtay in RSF ay isku diyaarinayso weerar dhulka ah oo culus oo lagu qaado magaalada Al-Obeid, oo ah caasimadda gobolka.
Madaafiicda diyaaradaha aan duuliyaha lahayn ee lagu weeraray xarumaha korontada ee magaalada ayaa durba “carqaladeynaya helitaanka biyaha nadiifka ah ee badbaadada nolosha iyo adeegga korontada,” ayuu Talaadadii sheegay Madaxa Arrimaha Bani’aadannimada ee Qaramada Midoobay, Tom Fletcher, isagoo ka digay halista xasuuqyo baahsan.
Isbitaallada oo si weyn ay u saameeyeen dagaalladu
Saddex sano oo dagaal ah kadib, ku dhowaad dhammaan isbitaallada dalka ayaa gebi ahaan ama qayb ahaan shaqada joojiyay.
“Afartan boqolkiiba xarumaha caafimaadku gabi ahaanba ma shaqeeyaan, halka ku dhowaad 60 boqolkiiba ee harayna ay si qayb ahaan ah u shaqeynayaan, taasoo la macno ah inay bixiyaan adeegyo kooban ama aan ku filnayn bukaannada ku nool deegaannada ay adeegaan,” ayuu yiri Wakiilka iyo Madaxa Hawlgalka WHO ee Suudaan, Shible Sahbani.
