Safaaradda Jamhuuriyadda Federaalka Soomaaliya ee dalka Masar, iyadoo kaashanaysa Ururka Ardayda Soomaaliyeed iyo Jaaliyadda Soomaaliyeed ee Masar, ayaa qabatay munaasabad si weyn looga soo qayb galay oo lagu xusayay sannad-guurada 66-aad ee Maalmaha Xorriyadda iyo Midnimada Soomaaliya, kuwaas oo ku asteysan 26-dii Juun iyo 1-dii Luulyo 1960.
Munaasabadda ayaa waxaa ka soo qayb galay boqolaal xubnood oo ka tirsan jaaliyadda Soomaaliyeed ee ku nool Masar, oo ay ku jireen aqoonyahanno, arday, saraakiil ciidan oo waxbarasho u jooga dalka, hoggaamiyeyaal bulsho, xubno ka tirsan Baarlamaanka Federaalka Soomaaliya, diblomaasiyiin, iyo Danjiraha Jamhuuriyadda Jabuuti u fadhiya Masar, Axmed Cali Barre.
Mas’uuliyiintii ka hadlay munaasabadda ayaa iftiimiyay muhiimadda ay leeyihiin Maalmaha Xorriyadda Soomaaliya, iyagoo carrabka ku adkeeyay muhiimadda ilaalinta midnimada qaranka, madaxbannaanida, iyo dowladnimada Soomaaliya.
Isagoo khudbad ka jeediyay munaasabadda, Danjiraha Jabuuti ee Masar, Axmed Cali Barre, ayaa ku tilmaamay Soomaaliya dal hodan ku ah fursado badan, wuxuuna ugu baaqay Soomaalida inay ilaashadaan midnimadooda iyo qiyamka waddaniyadda.
Danjiraha Soomaaliya ee Masar, Cali Cabdi Awaare, ayaa hambalyo u diray dhammaan shacabka Soomaaliyeed munaasabadda awgeed, gaar ahaan jaaliyadda Soomaaliyeed ee ku nool Masar. Wuxuu ugu baaqay inay ilaaliyaan midnimada Soomaaliya, dhowraan sumcadda dalkooda, isla markaana ixtiraamaan shuruucda dalka ay martida ku yihiin.
Danjire Awaare ayaa sidoo kale uga mahadceliyay Jamhuuriyadda Carabta ee Masar taageerada joogtada ah ee ay siiso Soomaaliya, gaar ahaan deeqaha waxbarasho ee ay siiso ardayda Soomaaliyeed, isagoo ku tilmaamay taageeradaas mid door weyn ka qaadatay horumarka dalka.
Wuxuu mar kale xaqiijiyay sida ay Safaaraddu uga go’an tahay u adeegidda muwaadiniinta Soomaaliyeed ee ku nool Masar, isagoo sheegay in albaabbada Safaaraddu ay mar walba u furan yihiin dhammaan xubnaha jaaliyadda Soomaaliyeed.
Ugu dambeyn, Danjiraha ayaa soo dhoweeyay ka qaybgalka Madaxweyne Xassan Sheekh Maxamuud ee dabaal-degyada 1-da Luulyo ee Muqdisho, isagoo ku tilmaamay astaan muujinaysa Soomaaliya nabad ah oo ku tallaabsanaysa jidka midnimada, xasilloonida, iyo barwaaqada.
