Munaasabadda xil wareejinta ayaa waxaa guddoomiyay Taliyaha Ciidanka Uganda ee ku sugan Soomaaliya, Sarreeye Guuto Jackson Kayanja, oo ku ammaanay Korneyl Aragamoi hoggaamintiisii, xirfaddiisii, iyo dadaalkii uu muujiyay muddadii uu howlgalka ku jiray.
Sarreeye Guuto Kayanja ayaa sheegay in taliye ku-xigeenkii xilka wareejiyay uu door muhiim ah ka qaatay dhowr howlgal oo ciidan, oo ay ka mid ahaayeen Operation Silent Storm, Operation Hidden Sword, iyo Operation Rolling Thunder. Wuxuu xusay in howlgalladan ay gacan ka geysteen xoreynta iyo xasillinta deegaannada Sabiid-Caanoole, Bariire, Awdheegle, Mubaarak, Durasalaam, Jiriib iyo Danane.
“Korneyl Aragamoi wuxuu qabtay shaqo aad u wanaagsan muddadii uu ahaa Taliye Ku-xigeenka Ciidanka,” ayuu yiri Sarreeye Guuto Kayanja. “Hoggaamintiisii howlgalada Silent Storm, Hidden Sword iyo Rolling Thunder waxay si weyn uga qayb qaadatay guusha howlgalka. Wuxuu ahaa sarkaal dadaal badan, daacad ah, isla markaana si wanaagsan ula shaqeeya dadka kale.”
Taliyaha ciidanka ayaa soo dhoweeyay Korneyl Rukubya oo la wareegay xilka cusub, isagoo muujiyay kalsooni buuxda in hoggaamintiisa iyo waayo-aragnimadiisa dhinaca howlgalada ay sii xoojin doonaan kaalinta ciidanka Uganda ee howlgalka Midowga Afrika.
Isagoo ka hadlay munaasabadda, Korneyl Aragamoi ayaa uga mahadceliyay hoggaanka Ciidanka Difaaca Shacabka Uganda (UPDF) fursadda ay u siiyeen inuu ka adeego Soomaaliya, wuxuuna sidoo kale uga mahadceliyay Sarreeye Guuto Kayanja hagidda iyo taageerada uu siiyay muddadii uu xilka hayay.
“Waxaan si kal iyo laab ah ugu mahadcelinayaa hoggaanka sare ee UPDF fursadda ay ii siiyeen inaan ka shaqeeyo goobta howlgalka,” ayuu yiri. “Waxaan sidoo kale uga mahadcelinayaa Taliyaha Ciidanka talooyinkiisa iyo taageeradiisa intii aan xilka hayay.”
Dhankiisa, Korneyl Rukubya ayaa ballan qaaday inuu sii ambaqaadi doono guulihii uu gaaray kii ka horreeyay, isagoo xoogga saari doona wada-shaqeynta, anshaxa, iyo xirfadda ciidanka si loo taageero dadaallada Hawlgalka Taageerada iyo Xasilinta Midowga Afrika ee Soomaaliya (AUSSOM) ee lagu soo celinayo nabad iyo xasillooni waarta Soomaaliya.
Munaasabadda ayaa sidoo kale lagu qabtay xil wareejinta Sarkaalka Howlgalada ee Ciidanka Uganda, iyadoo Gaashaanle Dhexe Garvas Kabagambe uu xilka ku wareejiyay Gaashaanle Dhexe Joseph Tibenda Uma Savimbi.
Waxaa munaasabadda ka qayb galay saraakiil sare iyo kuwo hoose, iyo sidoo kale saraakiil-xigeenno (NCOs) ka tirsan ciidanka Uganda ee ka howlgalaya Soomaaliya.
