Ciidanka Xoogga Dalka Soomaaliyeed, gaar ahaan Guutooyinka 27-aad iyo 17-aad ee Ciidanka Dhulka, ayaa hawlgal amni ka fuliyay deegaannada u dhexeeya Sabiid, Caanoole iyo Bariire ee gobolka Shabeellaha Hoose.
Intii uu hawlgalku socday, ciidamada ayaa ka shaqeeyay ka hortagga khataraha ay maleeshiyada Al-Shabaab ku hayaan dadka rayidka ah, gaar ahaan beeraleyda ku nool deegaanka oo bartilmaameed u noqday baad iyo dhac loo gaysto hantidooda.
Ciidanka Xoogga Dalka Soomaaliyeed ayaa sidoo kale miino-baaris ka sameeyay waddooyinka isku xira deegaannadaas, si looga hortago in walxaha qarxa loo adeegsado waxyeellaynta dadka rayidka ah ee waddooyinka ku safra.
Ciidanka Xoogga Dalka Soomaaliyeed ayaa sii wada dadaallada lagu sugayo amniga muwaadiniinta Soomaaliyeed iyo la-dagaallanka Al-Shabaab, oo khatar ku ah nolosha iyo mustaqbalka shacabka Soomaaliyeed.
