Ilaalada Xeebaha Muritaaniya ayaa sheegtay inay Axaddii xeebaha Badweynta Atlaantik ee dalkaas ka soo badbaadiyeen 260 tahriibayaal ah oo saarnaa laba doon, kuwaas oo ay ku jireen 17 carruur ah.
Tahriibayaasha ayaa saarnaa laba doon oo ka soo shiraacday Banjul ee Gambia, waxayna ku jireen xaalad naxdin leh kaddib markii ay ka dhammaadeen raashinka, isla markaana ay la kulmeen dhibaatooyin dhinaca shidaalka iyo hagidda safarka ah, ayay hay’addu sheegtay.
Waxaa lagu arkay meel ka baxsan xeebaha caasimadda Nouakchott, kaddib markii ay badda ku jireen qiyaastii toddobo maalmood, ayay raacisay.
Dadka la soo badbaadiyay waxaa ka mid ahaa 132 muwaadiniin Senegal ah, 120 Gambian ah, afar Guinean ah iyo dhowr qof oo kale oo ka soo jeeda Galbeedka Afrika, sida lagu sheegay bayaan ka soo baxay ilaalada xeebaha.
Marka laga soo tago 17-ka carruurta ah, 61 haween ah ayaa sidoo kale saarnaa doomaha, ayaa lagu yiri bayaanka.
Kumanaan qof oo u badan dhallinyaro ayaa sannado badan isku dayayay inay maraan jidka halista badan ee Badweynta Atlaantik, iyagoo raacaya doomo dadku ku badan yihiin oo inta badan xaaladdoodu liidato, si ay Yurub uga gaaraan Jasiiradaha Canary ee Spain.
Qaar badan ayaa ka cararaya saboolnimada, waxayna safarkan qarsoodiga ah u galaan iyadoo dalalka Yurub ay si weyn u xaddideen bixinta fiisaha, isla markaana ay adkeeyeen ilaalinta xuduudahooda.
