Dabley hubeysan ayaa 11 qof ku dilay, saddex kalena ku dhaawacay weerar habeenkii ka dhacay guri ku yaalla gobolka KwaZulu-Natal ee bariga Koonfur Afrika.

Shabakadda wararka ee eNCA ayaa sheegtay in weerarku ka dhacay xaafadda KwaMakhutha, oo koonfur ka xigta magaalada Durban, wax yar ka hor 11-kii habeenimo ee Talaadadii.

Dadka la dilay waxaa ka mid ahayd haweeney uur leh.

Dhibbanayaasha ayaa guriga ku sugnaa markii dabley aan la aqoonsan ay gudaha u galeen, kadibna rasaas ku fureen.

Toban qof ayaa goobta ku dhintay, halka qof kale uu markii dambe dhaawacii soo gaaray ugu geeriyooday isbitaalka.

Dableyda ayaa sidoo kale dab qabadsiiyay gaari uu lahaa milkiilaha guriga ka hor inta aysan goobta ka baxsan.

Booliska ayaan weli shaacin sababta ka dambeysay weerarka, mana jirto cid ilaa hadda loo soo xiray. Mid ka mid ah dadka deegaanka oo la hadlay warbaahinta ayaa sheegay inuu la koray qaar ka mid ah dhibbanayaasha.

“Waa arrin naxdin iyo murugo leh... Nolosheyda oo dhan halkan ayaan deganaa, waligayna ma arag wax sidan oo kale ah,” ayuu yiri.

Dhacdadan ayaa ku soo beegmaysa xilli Koonfur Afrika ay la tacaalayso dilal aad u badan, iyadoo celcelis ahaan maalin kasta dalka lagu dilo ku dhawaad 60 qof. Koonfur Afrika waxaa ku nool dad lagu qiyaaso 62 milyan.

Hubka sharciyeysan iyo kan sharci-darrada ah ayaa si weyn ugu baahsan Koonfur Afrika, waxaana dalka ka dhaca toogashooyin lala xiriiriyo kooxaha burcadda ah iyo murannada ka dhasha ganacsiyada sharci-darrada ah.

Bishii Maarso, dowladda ayaa ciidamo milateri ah geysay deegaannada ay rabshadaha iyo dambiyada hubeysan ku badan yihiin si ay booliska uga taageeraan sugidda amniga.

Madaxweyne Cyril Ramaphosa ayaa dambiyada hubeysan ku tilmaamay mid ka mid ah khataraha waaweyn ee dalka wajahaya.