Magaalada Nairobi ee caasimadda dalka Kenya ayaa martigelisay Shirweynaha Maalgashiga iyo Bandhigga Macdanta Kenya ee 2026 (MICE 2026), kaas oo kulmiyay wasiirro, maalgashadayaal, iyo khubaro ku xeel-dheer warshadaha soo-saaridda kheyraadka dabiiciga ah ee qaaradda Afrika.
Shirkan ayaa diiradda lagu saaray istaraatiijiyad cusub oo qaaraddu ay ku doonayso in ay kaga gudubto dhoofinta macdanta ceeriin, iyadoo beddelkeeda la dhiirrigelinayo in sifeynta iyo warshadaynta lagu dhex sameeyo dalalka Afrika, si kor loogu qaado qiimaha kheyraadka, isla markaana loo abuuro fursado shaqo iyo koboc dhaqaale oo waara.
Dowladda Federaalka Soomaaliya oo xilligan dadaal ugu jirta in ay ka faa’iidaysato kheyraadkeeda dihin, ayaa madashan si weyn uga dhex muuqatay, iyadoo uu matalayay Wasiirka Batroolka iyo Kheyraadka Macdanta, Daahir Shire Maxamed, oo uu wehliyo Danjiraha Soomaaliya ee Kenya, Jabriil Ibraahim Cabdulle.
Wasiir Daahir oo khudbad istaraatiiji ah ka jeediyay shirka, ayaa xaqiijiyay in Soomaaliya ay haatan diyaar u tahay dhiirrigelinta maalgashiga iyo adeegsiga tiknoolajiyadda casriga ah si ay si buuxda ugala soo baxdo kheyraadkeeda.
Wuxuu warbaahinta u sheegay in ujeeddada ugu weyn ee wafdigiisu ay tahay in ay waayo-aragnimo iyo khibrad dhinaca maaraynta ah ka kororsadaan dalalka Afrika ee muddada dheer ku soo jiray faa’iidaysiga macdanta. Doorka dublomaasiyadeed ee Safaaradda Soomaaliya ee Nairobi ayaa qayb weyn ka qaatay xaqiijinta isku-xirkan heerka gobol ah.
Dhanka kale, wasiirka macdanta ee dalka martida loo yahay ee Kenya, Hassan Ali Joho, ayaa bogaadiyay isku-duubnida ay muujiyeen dalalka qaaradda.
Wasiir Joho oo faahfaahinayay jawigii casho-sharaf lagu xirayay maalintii koowaad ee shirka, ayaa ku tilmaamay habeen xambaarsan faan iyo dhiirrigelin, kaas oo lagu abaalmariyay shakhsiyaadkii guulaha wax-ku-oolka ah ka gaaray warshadaha macdan-qodista.
Wuxuu xusay in madasha lagu maamuusay mudane Francis Kalinzoya oo la guddoonsiiyay ‘Abaalmarinta Hormuudka Macdan-qodista’, taas oo ka markhaati kacaysa raadka qotada dheer ee uu ku yeeshay waaxdan.
Isagoo la hadlayay wufuudda caalamiga ah, Wasiir Joho ayaa bogaadiyay wadahadallada macnaha weyn xambaarsan ee diiradda saarayay xaqiiqada dhabta ah ee haatan jirta iyo fursadaha mustaqbalka ee maalgashiga macdanta.
Ugu dambayn, wasiirka ayaa u mahadceliyay wasiirrada dhiggiisa ah ee madasha ka soo qaybgalay, kuwaas oo isugu jiray Wasiirka Macdanta Naajeeriya Dr. Oladele Henry Alake, Wasiirka Tansaaniya Anthony Mavunde, Wasiirka Soomaaliya Daahir Shire Maxamed, iyo Wasiirka Koonfurta Suudaan Losuba Ludoru Wongo, isagoo ku tilmaamay joogitaankooda mid xoojinaya aragtida wadajirka ah ee lagu horumarinayo warshadaha macdanta ee Afrika.
