Hukumomin Ghana da Amurka sun kama mutane da yawa da ake zargi da satar bayanai ta intanet da suka haura dala miliyan 10, in ji FBI a ranar Alhamis, wanda shi ne aiki na baya bayan nan na kai samame kan "dandalin masu zamba".

Masu zamba da ke aiki a cikin manyan ƙungiyoyi a wajen gidaje ko rukunin gidaje galibi suna kai damfarar mutane a duk faɗin duniya.

"Wani sabon hari da aka kai a wannan makon a Ghana," in ji darektan FBI Kash Patel a shafukan sada zumunta, yana wallafa hoton wakilan Amurka tare da hukumomin Ghana.

Patel ya ce an kama mutane 130, ciki har da mutanen da aka yi safarar su aka tilasta musu yin aiki a cikin harabar, saboda zamba da aka yi wa mutane 89.

Ba a fayyace asalin ƙasashen waɗanda abin ya shafa ko kuma waɗanda ake zargin sun aikata laifin ba.

'Aikin Daƙile Miyagu'

Wannan hari shi ne na baya-bayan nan a cikin "Aikin Daƙile Miyagu" na FBI, wanda ya mayar da hankali kan ayyukan zamba ta intanet.

"Waɗannan ayyukan zambar suna kai farmaki kan Amurkawa kuma suna raguza rayuka," in ji Patel.

Patel ya ce a aikin na Daƙile Miyagu ya zuwa yanzu ya ƙwace dala biliyan 17 a duk duniya kuma ya yi gargaɗi ga Amurkawa sama da 10,000 da ke cikin haɗarin za a zambace su.

A watan Fabrairu, Interpol ta sanar da cewa 'yansanda a ƙasashen Afirka 16 sun kama mutane 651 a wani samame na tsawon makonni takwas da suka kai hari kan zamba ta saka hannun jari, zamba ta hanyar wayar salula da kuma aikace-aikacen lamunin wayar salula na zamba.

Yawancin wadanda abin ya shafa 'yan Afirka ne.