Wata kotun Las Vegas ta samu wani tsohon shugaban ƙungiyar ‘yandaba da laifin kisan kai a shari'ar da a zarge shi da shirya kisan gillar da aka yi wa fitaccen mawakin hip-hop Tupac Shakur, wanda hakan ya kawo ƙarshen shari'ar da aka shafe shekaru da dama ana yi.

An tuhumi Duane "Keffe D" Davis, mai shekaru 63, a gundumar Clark ta Nevada da laifi ɗaya na kisan kai da nugun makami.

Masu taimaka wa alkali sun yanke hukuncin cikin ƙasa da awanni uku.

An zargi Davis da jagorantar wasu mutane wajen kashe Shakur, mai shekaru 25, wanda yake ɗaya daga cikin mawakan rap mafi nasara a fannin kasuwanci da tasiri, a matsayin ramuwar gayya kan dukan ɗan’uwan ​​Davis ɗin.

'Yansanda sun daɗe suna zargin Davis amma ba su da isassun shaidu da za su tuhume shi har sai da ya bayyana labaransa a hirarrakin kafofin watsa labarai da kuma wani tarihin rayuwarsa, wanda tare da naɗar murya ta wata ganawar sirri ta masu bincike suka zama ginshiƙin shari'ar mai gabatar da ƙara.

Lauyan da ke kare Davis ya yi bayyana cewa maganganun wanda yake karewa ba su da tushe balle makama.

Rikicin gidan caca na 1996

A lokacin shari'ar, wadda aka fara a ranar 17 ga Agusta, masu gabatar da kara sun gabatar da tattaunawa da aka naɗa da ke bayanin yadda Davis ya fusata bayan da Shakur da tawagarsa suka daki ɗan’uwansa a wani gidan caca na Las Vegas a ranar 7 ga Satumba, 1996.

Davis da wasu mutane uku, ciki har da ɗan’uwansa, sun nemi Shakur da kuma Marion "Suge" Knight, Shugaban wajen harkokin kiɗa na Death Row Records, da suka shiga yarjejeniya da Tupac daga baya a wannan daren.

Davis ya amince cewa ya miƙa bindiga kujerar baya, inda daya daga cikin fasinjoji biyu ya buɗe wuta lokacin da suka tsaya a wajen motar Knight da Shakur.

Masu gabatar da ƙara ba su ambaci sunan mai harbin ba, kuma sauran mutanen uku da ke cikin motar tuni sun mutu.

A ƙarƙashin dokar Nevada, Davis ya fuskanci tuhumar kisan kai a matsayin wanda ya yi hadin gwiwa da ƙungiyar rap duk da cewa ba shi ya haddasa kinsa ba.

Davis ya jagoranci Southside Compton Crips, wata kungiyar 'yandaba ta titi a Los Angeles da ke rikici da ƙungiyar 'yandaba ta Mob Piru, mai alaƙa da Shakur da Death Row Records.

Mutuwar Shakur ta nuna wani muhimmin lokaci a tarihin hip-hop a lokacin da ake fafatawa tsakanin ɓangarorin East Coast–West Coast da ba sa shiri da juna a shekarun 1990.