Sanata Chris Coons na Amurka ya yi tsokaci kan dangantakar da ke tsakanin Turkiyya da Amurka, yana mai cewa dangantakar kasuwanci da sana’o’i sun taimaka wajen karfafa alaka tsakanin kasashen biyu.

Coons ya gabatar da jawabi a ranar Litinin a taron "Shekaru 100 na Abota" da aka gudanar a birnin New York, wanda shugaban kasar Turkiyya Recep Tayyip Erdogan da uwargidansa Emine Erdogan suka halarta.

Ya bayyana dangantakar da ke tsakanin kasashen biyu a matsayin "shekaru 100 na zumunci mai zurfi da ma'ana, wanda kasuwanci ya karfafa."

Da yake magana kan ziyarar da ya kai Ankara kwanan nan don halartar taron NATO, Coons ya yi tsokaci kan kawancen NATO na kasashen, yana mai cewa a shekara mai zuwa Turkiyya da Amurka za su cika shekaru 75 a matsayin kawaye a NATO.

Gudunmawa masu muhimmanci

Yayin da yake magana kan muhimman gudunmawar da 'yan kasuwar Turkiyya ke bayarwa a Amurka, Coons ya bayyana cewa taron kolin kungiyar NATO da aka gudanar a Ankara shi ma ya taka muhimmiyar rawa wajen karfafa makomar kawancen.

Taron bikin cika shekaru 100 na zumunci, wanda Kungiyar 'Yan Kasuwa ta Amurka da Majalisar Kasuwanci ta Amurka da Turkiyya (USTBC) suka shirya tare da karbar bakuncin Shugaban Majalisar Hamdi Ulukaya a birnin New York, ya samu halartar Ministan Harkokin Wajen Turkiyya Hakan Fidan, Ministan Baitulmali da Kudi Mehmet Simsek, Ministan Ciniki Omer Bolat, Ministan Makamashi da Albarkatun Kasa Alparslan Bayraktar, Ministan Masana'antu da Fasaha Mehmet Fatih Kacir, Ministan Lafiya Kemal Memisoglu, da kuma Ministar Iyali da Ayyukan Jama'a Mahinur Ozdemir Goktas.

Haka kuma, taron ya samu halartar Mehmet Oz, shugaban cibiyar kula da shirye-shiryen magumguna da tallafin magunguna, tare da manyan jami'an gwamnatin Amurka da dama da kuma 'yan majalisar dokokin kasar.