Ministan harkokin cikin gida na Nijeriya, Olubunmi Tunji-Ojo, ya bayar da wa’adin mako biyu ga kwamitin mutum 10 mai zaman kansa da gwamnatin tarayyar ƙasar ta kafa don yin bincike kan mutuwar mutum 37 a hannun rundunar tsaro ta NSCDC a jihar Neja.
Wata sanarwa da ma’aikatar harkokin cikin gida ta Nijeriya ta wallafa a shafinta na X ranar Talata ta ambato ministan yana kira ga kwamitin ya yi aiki cikin ‘yanci ba tare da tsoma bakin kowa ba, yana mai jaddada cewa adalci shi ne abin da ya fi dacewa a yi wa mamatan da iyalansu.
Sanarwar ta ce an bai wa kwamitin aikin gano aihinin adadin mutanen da suka mutu da yanayin da ya haddasa mutuwarsu ta hanyar amfani da binciken kimiyya.
Kazalika aikin kwamitin ya haɗa da tabbatar da ko akwai sakaci da aikata ba daidai ba da haɗin baki ko keta doka a aukuwar lamarin.
Har wa yau gwamnatin Nijeriya tana buƙatar kwamitin ya ba da shawarwari game da matakan hukunci da suka dace da kuma diyyar da ta kamata a bai wa iyalan waɗanda suka mutu.
Haka kuma an buƙaci kwamitin ya bayar da shawara kan matakan da suka kamata a ɗauka domin hana sake aukuwar irin lamari.
Dakta Tunji-Ojo ya umarci shugabannin NSCDC da jami’an da lamarin ya shafa su ba da cikakken haɗin kai ga kwamitin kuma su kare dukkan bayanai da hujjoji da ke da alaƙa da lamarin, in ji sanarwar.
Ya yi gargaɗin cewa duk wani yunƙuri na lalata ko kuma ɓoye hujja ko tsoratar da shaidu ko kuma yin ƙafar-ungulu ga binciken za a ɗauke shi ne a matsayin laifi mai muni.
“Za mu yi komai cikin gaskiya. Wannan kwamitin zai ba ku gaskiyar lamari. Babu wani hafsa, duk girman matsayinsa, da za a kare idan aka same shi da laifi,” kamar yadda sanarwar ta ambato shi yana bayyanawa ga ‘yan Nijeriya.
Kwamitin da ke ƙarƙashin jagorancin Mista Jonathan Kure, ana sa rai zai fara aiki ne nan-take kuma ya miƙa rahotonsa cikin makonni biyu.
