Real Madrid ta tsuga kuɗi kan ɗanwasanta Vinicius Junior wanda ake dangantawa da komawa Arsenal, a cewar jaridar Sport.

Rahoton ya ce shugaban Real Madrid, Florentino Perez, ba zai amince da sayar da ɗan wasan na Brazil ba sai idan wata ƙungiya ta gabatar da tayin da ya kai fam miliyan 137.

Vinicius ya kasance ɗaya daga cikin fitattun 'yan wasan Real Madrid a cikin shekarun baya-bayan nan, inda ya zura kwallaye 128 tare da bayar da taimako aka ci ƙwallaye 100 a wasanni 375 da ya buga a dukkan gasa.

Kwantiragin ɗanwasan a filin wasa na Santiago Bernabeu za ta ƙare a shekara mai zuwa. Sai dai tattaunawar sabunta kwantiraginsa ta tsaya cik, lamarin da ke barin Real Madrid cikin haɗarin rasa shi kyauta a bazara mai zuwa.

Duk da raunin da ƙungiyar ke da shi a tattaunawa kan kwantiragin, rahoton ya ce ƙungiyar ta La Liga ba za ta amince da sayar da Vinicius ba sai an gabatar mata da tayin da ya kai fam miliyan 137.

Arsenal ta riga ta ɗauki Christos Tzolis, amma har yanzu tana neman ƙarin ɗanwasan gaba.

Ana sa ran Gabriel Jesus da Gabriel Martinelli za su bar ƙungiyar a wannan bazarar, abin da ya sa Arsenal ke neman fitaccen ɗan wasan gaba.

Vinicius zai zama babban kamu ga Arsenal, amma ƙungiyar ta Premier League za ta buƙaci kashe kuɗi mafi yawa a tarihinta domin samun sa hannunsa.

Ɗan wasan mai shekaru 26 ana ɗaukarsa a matsayin ɗaya daga cikin fitattun 'yan wasan gaba a duniya, saboda saurinsa, ƙwarewarsa wajen wuce 'yan wasa da kuma iya zura ƙwallaye.

Ya kuma taka rawa sosai a gasar Kofin Duniya da aka gudanar a wannan bazarar, inda ya zura ƙwallaye huɗu a wasanni biyar da ya buga wa Brazil.