Mai tsaron bayan Argentina Lisandro Martinez ya yi watsi da ce-ce-ku-ce game da alƙalanci a Gasar Kofin Duniya kuma ya ce jami’an wasa suna aiki mai kyau bayan Masar ta soki hukunce-hukuncen a kayen da ta sha da ci 3-2 a wasansu na zagayen ƙasashe 16.
Argentina ta kai matakin takwas na ƙarshe bayan ta taso daga kasancewa ƙasa da ƙwallaye biyu kuma ta samu ta doke Masar cikin mintuna 11.
Sai dai kuma wasan ya tayar da ƙorafi daga hukumar ƙwallon ƙafa ta Masar game da amfani da VAR, musamman yadda aka soke ƙwallon da Mostafa Zico ya zura a raga minti 62 da fara wasa.
Argentina ta fuskanci suka mai tsauri a shafukan intanet, inda mutane da yawa ke iƙirain cewa ƙasar mai kare kambunta tana amfana da sonkai daga alƙalan wasa masu hura wasanni.
Shugaban ɓangaren alƙalanci na FIFA Pierluigi Collina ya kare jami’an, inda ya yi watsi da zarge-zargen sonkai kuma ya jaddada cewa alƙalan suna aiki ne bisa ‘yancin kansu.
"A a, babu komai," kamar yadda Martinez ya shaida wa manema labarai lokacin da aka tambaye shi kan ko yana da wani abin faɗa game da alƙalanci a gasar.
"Ina tunanin suna aiki mai kyau. Wannan wani abu ne gare ku (kafafan watsa labarai), waɗanda a wasu lokuta ke tayar da ce-ce-ku-ce. Mun mayar da hankalinmu ne kan yin iya ƙoƙarinmu a cikin fili kawai," in ji shi .
Karawa da Switzerland
Argentina za ta kara da Switzerland ranar Asabar a wasansu na kwata final a Kansas City, inda ƙasa mai kare kambunta ke bayyana girmamawa ga ƙasar ta Turai yayin da take jaddada buƙatar da ke akwai ta mayar da hankali kan ƙwarewarta.
"Kamar kullum, abin da ya bambanta wannan tawaga shi ne girmama abokan gaba," in ji Martinez.
"Idan Switzerland suka kasance a wannan matakin , hakan ya faru ne saboda suna da ƙwarewa da yawa. Mun kalli wasansu da Colombia, kuma suna ƙoƙarin wasa a ko wane lokaci. Suna da ƙarfi sosai a zahiri da kuma wajen raba ƙwallaye. Ina ganin zai kasance babban wasa saboda tawagogin biyu suna ƙoƙarin wasa."
Mai tsaron gida Cristian Romero ya maimaita saƙon, yana mai cewa Argentina tana mayar da hankali ne kawai kan gyara kurakuranta.
"Koma da wane ne muka haɗu, ko ma mene ne sunan abokan hamayyar ko kuma inda suka fito, muna mayar da hankalinmu ne kan gyara kurakuran da muke da su," in ji Romero, wanda ya zura ƙwallon Argentina na farko a ragar Masar.
