Kim Yo-jong, ƙanwar shugaban Koriya ta Arewa Kim Jong-un mai ƙarfin faɗa-a-ji, ta bayyana ranar Alhamis cewa matsayin ƙasar na ƙasa mai makamin nukiliya na ƙin-ƙarawa ne, tana mai watsi da fatan zubar da makaman nukiliyar Pyongyang a matsayin abin da ba zai yiwu ba.

Koriya ta Arewa ta tabbatar da matsayarta ta ƙasa mai makamin nukiliya a doka, inda shugabanninta ke nanata ayyana makaman nukiliyarta a matsayin abu na dindindin da ba za a iya sauyawa ba.

“Matsayin Jamhuriyar Dimokuraɗiyyar Mutane ta Koriya (DPRK) na ƙasa mai makamin nukiliya na ƙin-ƙarawa ne wanda ba za a iya sauyawa da komai ba,” kamar yadda Kim Yo Jong ta bayyana a wata sanarwa da kamfanin dillancin labaran Koriya ya ambato inda ya yi amfani da sunan da Koriya ta Arewa ke amfani da shi a hukumance.

Ta ce tarin makaman nukiliyar ƙasar na ba da “muhimmiyar gudunmawa” ga hana abin da ta kira matakai na ƙiyayya na ƙasashen waje masu ƙarfi.

Koriya ta Arewa ta yi watsi da kira na zubar da makaman nukiliya

Kim ta yi kalaman ne yayin da Hukumar Kula da Makamashin Nukiliya ta Duniya ta gudanar da babban taronta a Vienna, tana mai cewa ya kamata a tsammanci sabbin kiraye-kiraye na watsar da makaman nukiliyar Koriya ta Arewa.

“Idan suka zaci cewa hakan zai yiwu, za su saurari kalaman wawaye ne kawai,” in ji ta, tana mai ƙarawa da cewa matsayin nukiliya na Koriya ta Arewa ba zai yiwu a sauya shi ba saboda an riga an “daidaita shi na har abada a zahiri da kuma a hukumance.”

Kalaman na zuwa ne yayin da Shugaban Amurka Donald Trump ya sake nuna buƙatar ganawa da Kim Jong-un, lamarin da Koriya Ta Kudu ta fara isa ido sosai kan martanin Pyongyang.

Wani jami’in ma’aikatar Haɗin kai ta Koriya ta Kudu ya ce sanarwar Kim Yo-jong na da muhimmanci saboda lokacin da aka fitar da ita, yana mai cewa kwanan nan ne Trump ya bayyana son tattaunawa da Koriya Ta Arewa.

Trump ya yi ishara ga sabunta tattaunawa

Trump na nanata cewa ya shirya sake fara tattaunawar diflomasiyya kai-tsaye da Kim. Shugaban Amurka ya gana da shugaban Koriya ta Arewa sau uku a lokacin wa’adinsa na farko, amma tattaunawar ta ci tura bayan ganawarsu ta shekarar 2019 a Hanoi ta gaza samar da wata yarjejeniya kan rage raɗaɗin takunkumi ko kuma matakai da za su kai ga watsar da makaman nukiliyar ƙasar.

Koriya ta Arewa ta ci gaba da faɗaɗa ikon nukiliyarta tun bayan taron na Hanoi.

Trump ya bayyana a watan Agusta cewa Koriya ta Arewa tana da makaman nukiliya “masu ƙarfi sosai” guda 57, yayi da ƙiyasin Koriya ta Kudu ke cewa adadin tarin makaman nukiliyar Pyongyang ya kai 80 zuwa 120.