An gano wani ɓurɓushin kwanson dodon koɗi wanda ya rayu a gaɓar Tekun Tethys shekaru 66 da suka gabata, a wani wurin binciken tarihi da ke Ankara, Turkiyya, in ji Ministan Al’adu da Yawon Buɗe Ido na Turkiyya, Mehmet Nuri Ersoy.

An gano ɓurɓushin ne yayin da ake gudanar da aikin haƙar kayan tarihi a Kulhöyük, da ke unguwar Oyaca a gundumar Gölbaşı ta Ankara.

Ersoy ya bayyana a shafukan sada zumunta ranar Litinin cewa ana ganin kwanson ya samo asali ne daga ƙarshen zamanin Tekun Tethys, wani tsohon babban tekun da ya taɓa mamaye wasu sassan yankin da yanzu ake kira tsakiyar Anatoliya.

Masu bincike na nazarin ko mutanen da suka zauna a Kulhöyük ne suka gano ɓurɓushin a wani wuri sannan suka kawo shi da gangan zuwa wurin zamansu dubban shekaru da suka gabata.

Idan haka ne, hakan na iya samar da sabbin bayanai kan yadda abin ya isa wurin da kuma irin muhimmancin da mazauna wurin suka iya ba shi.

Tsohon wurin zama

Kulhöyük wani tsohon wurin zama ne mai kusan shekaru 5,000, wanda ake danganta shi da wayewar kan al’ummomin Hattian da Hittite. Saboda haka, halittar da ta zama ɓurɓushin ba ta rayu a zamanin da mazauna wurin suke rayuwa ba.

Ana ci gaba da aikin haƙa kayan tarihi a Kulhöyük tun daga shekarar 2021, a ƙarƙashin wani shirin binciken tarihi na dogon lokaci da fadar shugaban ƙasar Turkiyya ke tallafawa.

Mataimakiyar farfesa Derya Yılmaz Tekin ce ke jagorantar aikin a madadin Jami’ar Ankara da Ma’aikatar Al’adu da Yawon Buɗe Ido.

Ersoy ya ce za a ci gaba da aikin haƙa kayan tarihi domin ƙara fahimtar tarihin Kulhöyük ta hanyar sabbin abubuwan da ake sa ran za a gano.