Portugal ta doke Croatia da ci 2-1 a gasar Kofin Duniya, a wani wasa da aka soke ƙwallaye a mintunan ƙarshe.
A rabin farko na wasan da aka buga da maraicen Alhamis a birnin Toronto na Canada, tawagar da ke ƙarƙashin jagorancin Cristiano Ronaldo ta mamaye wasan.
Amma duk da haka, Croatia ce ta fara samun nasarar zura ƙwallo a ɓangare na biyu na wasan a minti na 53, ta hannun Ivan Perišić.
Sai dai Portugal ba ta yi wata-wata ba wajen mayar da martani. Bayan soke ƙwallon farko ta Portugal, Cristiano Ronaldo ya ciyo musu ta bugun fenareti a minti na 68.
Yayin da ake dab da tashi wasan, Portugal ta yi ta maza ta ci ƙwallo ta biyu a minti 90+4, ta hannun Gonçalo Ramos.
Croatia ta yi tunanin ta rama ƙwallo ta biyun a minti na 90+13 a lokacin da Mario Pašalić ya zura, amma bayan VAR ya duba ƙwallon, an soke ta.
A ƙarshe bayan mintuna 19 na ƙarin lokaci, Portugal ta yi nasarar wucewa zagaye na gaba, inda Croatia ta koma gida.
A yanzu Portugal za ta fafata da Sifaniya ranar Litinin, 6 ga Yuli a Filin Wasa na Dallas da ke Arlington.
