Mamlaka nchini Jamhuri ya Kidemokrasia ya Congo zimeanzisha uchunguzi baada ya moto kuzuka katika sherehe ya harusi jijini Kinshasa na kusababisha vifo vya watu wasiopungua 22 huku wengine kadhaa wakijeruhiwa.

Moto huo ulizuka katika jengo moja katika manispaa ya Lingwala mwishoni mwa siku ya Ijumaa na kuendelea hadi saa za mapema Jumamosi, ukiwanasa wageni walipokuwa wakijaribu kutoroka.

Inaripotiwa kuwa njia nyembamba za kupita ndani ya jengo hilo zilifungika huku waliohudhuria sherehe hiyo wakijaribu kukimbia moto huo kwa hofu kubwa.

"Tumekagua eneo hili, na ni wazi kuwa kanuni za usalama hazizingatiwi," Norbert Nzindula, meya wa Lingwala, aliambia Shirika la Habari la Kongo.

Utekelezaji wa hatua za usalama

"Hata njia ya dharura ya kutokea: kama unavyoona, watu walipata shida kufika mahali salama; kila mtu alikuwa na hofu kubwa. Hili ni jambo la kusikitisha, hivyo tutachukua hatua, na mamlaka zitatekeleza hatua kwa maeneo mengine ya kufanyia sherehe ndani ya eneo langu la utawala na katika jiji na jimbo zima la Kinshasa."

Video zilizosambaa sana zilionyesha watu kadhaa, wakiwemo walio hai na waliofariki, wakiwa wamelala kando ya barabara huku waliohudhuria sherehe wakijaribu kuwaokoa wale walionusurika kwenye moto huo.

Chanzo halisi cha moto huo bado hakijathibitishwa.

"Ni janga," alisema Jacquemin Shabani, Naibu Waziri Mkuu na Waziri wa Mambo ya Ndani wa Kongo, wakati wa ziara yake katika eneo la tukio Jumamosi asubuhi.

Moto unaosababisha vifo ni jambo la kawaida katika maeneo yenye msongamano mkubwa wa watu jijini Kinshasa, ambapo ukuaji wa haraka wa miji mara nyingi hufanyika bila miundombinu ya kutosha kama vile huduma za kuzima moto.

Hali hiyo ni hatari zaidi wakati wa msimu wa kiangazi, huku moto kadhaa ukiripotiwa jijini humo mwaka huu, kulingana na vyombo vya habari vya ndani.