Polisi nchini Afrika Kusini wameanzisha uchunguzi kuhusu kifo cha mchezaji wake wa soka, Jayden Adams, ambaye mwili wake ulipatikana mwishoni mwa wiki katika eneo la makazi jijini Cape Town.

Kwa mujibu wa vyombo vya habari vya ndani vilivyoripoti Jumatatu, Adams mwenye umri wa miaka 25, ambaye alikuwa kiungo wa timu ya Mamelodi Sundowns, aliichezea Afrika Kusini katika Kombe la Dunia mwaka huu.

Mwili wake ulipatikana Jumamosi asubuhi katika nyumba iliyopo kwenye Barabara ya Military Road, eneo la Schotsche Kloof jijini Cape Town.

Msemaji wa polisi alisema kuwa jalada la uchunguzi wa kifo limefunguliwa na kwamba mazingira yaliyosababisha kifo hicho bado yanachunguzwa. Hadi sasa, mamlaka hazijatoa taarifa kuhusu chanzo cha kifo chake.

Kifo cha Adams kimetokea wiki chache tu baada ya kusaidia timu ya taifa ya Afrika Kusini kufikia hatua ya mtoano ya Kombe la Dunia kwa mara ya kwanza katika historia yake.

Waziri wa Michezo, Sanaa na Utamaduni wa Afrika Kusini, Gayton McKenzie, amewaomba wananchi na vyombo vya habari kuwa na subira na kuepuka kutoa madai au kubashiri kuhusu chanzo cha kifo hicho wakati uchunguzi ukiendelea.

Heshima za mwisho kwa Adams, zikiwemo dakika za ukimya, zilifanyika katika baadhi ya mechi za Kombe la Dunia mwishoni mwa wiki.