Taliyaha Ciidanka Booliska Soomaaliyeed, Sarreeye Guuto Asad Cusmaan Cabdullaahi, ayaa dalka Jabuuti ku soo xiray tababar socday muddo saddex bilood ah oo la siiyay cutubyo ka tirsan ciidamada Daraawiishta.
Tallaabadan ayaa qayb ka ah dadaallada ballaaran ee dib-u-dhiska iyo tayeynta hay’adaha amniga Soomaaliya, xilli waddanku uu isu diyaarinayo in uu si buuxda ula wareego mas’uuliyadda amniga qaranka marka la gaaro xilliga bixitaanka ciidamada shisheeye.
Dufcaddan oo ah tii 24-aad ee lagu tababaro dalka Jabuuti, ayaa muddadii ay xerada ku jireen baranayay tabaha dagaalka casriga ah, qorsheynta istaraatiijiyadeed, iyo fulinta hawlgallada amniga ee gaarka ah.
Barnaamijkan tababarka ayaa waxaa si wadajir ah u bixinayay khubaro iyo macallimiin ka tirsan ciidanka Carabinieri ee dalka Talyaaniga, kuwaas oo caan ku ah xirfadaha sare ee la-tacaalidda xaaladaha cakiran iyo hawlgallada la-dagaallanka argagixisada.
Munaasabaddii xiritaanka tababarka, Sarreeye Guuto Asad Cusmaan ayaa bogaadiyay iskaashiga dhinaca amniga ee ka dhexeeya Soomaaliya, Jabuuti, iyo Talyaaniga.
Wuxuu carrabka ku adkeeyay in taageerada joogtada ah ee saaxiibbada caalamiga ah ay door laf-dhabar ah ka ciyaareyso dib-u-habeynta ciidamada qalabka sida, si ay awood ugu yeeshaan xaqiijinta xasilloonida dalka iyo ka-hortagga khataraha amniga ee ka imaanaya kooxaha hubeysan.
Tababarkan ayaa ku soo beegmaya xilli dowladda Soomaaliya ay dardargelinayso dhismaha ciidamo isku filan, taas oo ah shardi muhiim u ah qorshaha kala-guurka amniga ee lagula wareegayo fariisimaha iyo hawlgallada ay haatan gacanta ku hayaan ciidamada Midowga Afrika ee AUSSOM.
