Dhaxal-sugaha Boqortooyada Sacuudi Carabiya ahna Ra’iisul Wasaaraha dalkaas, Maxamed Binu Salmaan, iyo Guddoomiyaha Golaha Sare ee Ku-meel-gaarka ah ee Suudaan ahna Taliyaha Guud ee Ciidamada Qalabka Sida, Cabdifataax Al-Burhaan, ayaa maalintii Isniinta wadahadallo ku yeeshay magaalada Jeddah, sida lagu sheegay bayaan rasmi ah oo ka soo baxay labada dhinac.
Al-Burhaan oo gaaray magaalada Jeddah ayaa waxaa xarunta Madaxtooyada Boqortooyada ku qaabilay Dhaxal-sugaha Sacuudiga.
Intaas kaddib, labada mas’uul ayaa yeeshay kulan wadajir ah oo ay ku lafagureen xiriirka laba-geesoodka ah ee u dhexeeya Boqortooyada Sacuudi Carabiya iyo Jamhuuriyadda Suudaan, iyagoo sidoo kale ka wada hadlay fursadaha lagu ballaarin karo iskaashiga dhinacyada siyaasadda, dhaqaalaha, iyo amniga.
Sida laga soo xigtay Golaha Madax-bannaanida ee Suudaan, Al-Burhaan ayaa uga mahadceliyay dowladda Sacuudiga taageerada ay siiso dalkiisa, isagoo bogaadiyay wax uu ugu yeeray mowqifyada waxtarka leh ee Boqortooyada ay ka istaagtay arrimo dhowr ah.
Wuxuu dib u xaqiijiyay garab-istaagga iyo wadajirka ay dowladda Suudaan u muujinayso Sacuudiga, isagoo ku celiyay in Khartuum ay si adag u cambaaraynayso weerarrada lala beegsanayo amniga iyo xasilloonida Boqortooyada, oo ay ku jiraan duqeymaha Iiraan ay ku qaadday dhulka Sacuudiga.
Wuxuu sidoo kale carrabka ku adkeeyay in amniga qaranka Suudaan uu si dhow ugu xiran yahay kan Sacuudi Carabiya.
Wadahadallada ayaa sidoo kale diiradda lagu saaray isbeddellada dhanka amniga ee gobolka, iyadoo si gaar ah loo xoojiyay muhiimadda ay leedahay xasilloonida marinka Badda Cas.
Dhankiisa, Dhaxal-sugaha Sacuudiga ayaa soo dhaweeyay booqashada Al-Burhaan, wuxuuna dib u xaqiijiyay “xiriirka taariikhiga ah ee qotoda dheer” ee ka dhexeeya labada waddan.
Wuxuu mar kale caddeeyay in Sacuudi Carabiya ay si buuxda u taageersan tahay amniga, xasilloonida, madax-bannaanida, midnimada, iyo wadajirka dhuleed ee Suudaan. Labada dhinac ayaa isku raacay in la sii wado wadatashiyada iyo wada-shaqaynta dhow ee ku aaddan arrimaha gobolka ee ay wadaagaan daneyntooda.
Wafdiga dowladda Suudaan ayaa waxaa xubno ka ahaa Wasiirka Arrimaha Dibadda iyo Iskaashiga Caalamiga ah, Danjire Muxyaddiin Saalim; Agaasimaha Hay’adda Sirdoonka Guud, Sarreeye Guud Axmed Ibraahim Mufaddal; iyo Safiirka Suudaan u fadhiya Boqortooyada Sacuudi Carabiya, Dafcalla Al-Xaaj Cali.
Dhanka Sacuudiga, waxaa kulanka goobjoog ka ahaa Ku-xigeenka Guddoomiyaha Gobolka Makkah, Amiir Sacuud bin Mishaal bin Cabdulcasiis; Wasiirka Gaashaandhigga Khaalid bin Salmaan bin Cabdulcasiis; Wasiirka Arrimaha Dibadda, Faysal bin Farxaan Al Sacuud; Wasiiru Dowlaha ahna Xubin ka tirsan Golaha Wasiirrada iyo Lataliyaha Amniga Qaranka, Dr. Musaaacid Al-Caybaan; Madaxa Hay’adda Sirdoonka Guud, Khaalid bin Cali Al-Xumaydaan, iyo mas’uuliyiin kale oo sarsare.
