Wargeyska The Daily Telegraph ayaa boggooda ka saaray maqaal si khaldan ugu nisbeeyay hadallo kicin ah Madaxweynaha Turkiga Recep Tayyip Erdogan, kadib markii tifaftiraha guud ee wargeyska uu qiray in oraahyadu ay ahaayeen “kuwo qadiim ah ama gebi ahaanba been abuur ah.”

Maqaalka, oo la daabacay Sabtidii 12-ka Abriil, ayaa sheegay in Erdogan uu ku hanjabay inuu duullaan ku qaadi doono Israa’iil, isagoo soo xigtay hadallo been abuur ah oo la sheegay inuu ka jeediyay munaasabad siyaasadeed.

Warbixintu waxay soo xigatay Madaxweynaha Turkiga isagoo leh, “Sida aan u galnay Liibiya iyo Karabakh, waxaan geli karnaa Israa’iil,” kuwaasoo ah hadallo been-abuur ah.

Tifaftiraha guud ee Telegraph, Paul Nuki, ayaa soo saaray bayaan kooban oo uu ku qiray khaladka. “Salaan, waan ka saarnay warbixinta. Oraahyadu waxay u muuqdaan kuwo qad8iim ah ama gebi ahaanba been abuur ah. waan ka raalli gelinayaa,” ayuu Nuki ku qoray baraha bulshada.

Arrintan ayaa dhalisay su’aalo cusub oo ku saabsan heerarka tafatirka ee mid ka mid ah wargeysyada ugu caansan Britain. Warbixintu waxay soo baxday xilli ay jireen xiisado dib u soo cusboonaaday oo ka taagan Bariga Dhexe kadib xabbad-joojin aan cago badan ku taagneyn, xilli ay macluumaad khaldan oo ku saabsan dhinacyada gobolka keeni karaan cawaaqib culus.

Dhanka kale, qaar ka mid ah warbaahinta reer galbeedka ayaa si isdaba-joog ah xilligan si khaldan u soo bandhiga mowqifyada siyaasadda dibadda ee Turkiga isla markaana qalloociya hadallada mas’uuliyiinta Turkiga.

Ankara ayaa marar badan ugu baaqday hay’adaha warbaahinta caalamiga ah inay ilaaliyaan heerarka aasaasiga ah ee saxaafadda marka ay ka warbixinayaan arrimaha Turkiga, iyadoo ka digtay in warbixinno been abuur ah ama ka baxsan macnaha saxda ah ay kicinayaan dareen ka dhan ah Turkiga isla markaana wiiqayaan dadaallada diblomaasiyadeed ee gobollada xasaasiga ah.

Si kastaba ha ahaatee, Wargeyska The Telegraph ayaan soo saarin sixitaan rasmi ah oo ka baxsan qoraalka kooban ee Nuki ku daabacay baraha bulshada.