Madaxweynaha dalka Turkiga, Recep Tayyip Erdogan, ayaa bogaadiyay shabakadda warbaahinta dowladda ee TRT, xilli la xusayo sannad-guuradeedii 62-aad.
Madaxweynaha ayaa ku tilmaamay shabakaddan in ay tahay “marjac muhiim ah” oo ka dhex muuqda warbaahinta caalamka, isla markaana ah awood weyn oo lagula dagaallamo wararka been abuurka ah ee sii kordhaya.
Fariin hambalyo ah oo uu u diray Agaasimaha Guud ee TRT, Mehmet Zahid Sobaci, ayuu Madaxweyne Erdogan ku sheegay in TRT ay si weyn u xoojisay baahinteeda ku wajahan luuqadaha kala duwan ee caalamka, ayna si wanaagsan ula jaanqaadday baraha casriga ah.
Wuxuu ku sifeeyay warbaahintan in ay tahay “codka dalkeenna” iyo “xusuusta qarankeenna.”
Madaxweynaha ayaa xusay in TRT ay door weyn ku leedahay muujinta mowqifyada Turkiga ee fagaarayaasha caalamka iyo horumarinta “halganka caddaaladda” ee qaranka, isagoo carabka ku adkeeyay in uu aaminsan yahay in warbaahintani ay sii ahaan doonto “codka u hadla dalkeenna, qarankeenna, iyo dhammaan dadka la dulmiyay.”
“Doorka ay TRT ku leedahay in ay hiigsigeenna ‘Qarniga Turkiga’ gaarsiiso masraxa warbaahinta iyo dadaallada aan ku dooneyno in aan si xooggan beesha caalamka ugu bandhigno mowqifyadeenna xaqqa ah, ayaa ah mid leh ahmiyad aad u weyn,” ayuu yiri Erdogan.
‘Qarniga Turkiga’ ayaa ah hiigsi siyaasadeed oo uu Madaxweynuhu daah-furay sannadkii 2023, kaas oo ujeedkiisu yahay ballaarinta saamaynta caalamiga ah ee Turkiga.
Shabakadda TRT, oo la aasaasay sanadkii 1964-kii, ayaa ah warbaahinta dowladda ee ugu weyn dalkaas, iyadoo baahisa warar iyo barnaamijyo ku baxa in ka badan 40 luuqadood oo caalami ah, maamushana kanaallo kala duwan oo si weyn looga daawado adduunka, sida TRT World, TRT Arabi, iyo TRT Espanol.
